Ukraina admoviłasia dać palityčny prytułak arhanizataru hiej-marša ŭ Biełarusi, hramadskamu aktyvistu Edvardu Tarleckamu.
Pra heta havorycca ŭ materyjałach suda, pieradajuć «Ukrainskija Naviny».
U vieraśni 2016 Dziaržaŭnaja mihracyjnaja słužba Ukrainy (DMSU) admoviłasia pryznać jaho ŭciekačom abo asobaj, jakaja patrabuje dadatkovaj abarony. Tarlecki źviarnuŭsia ŭ Akruhovy administracyjny sud Kijeva z pazovam da DMSU.
Jon pakinuŭ Biełaruś i źjechaŭ va Ukrainu 4 žniŭnia 2009 hoda. Z zajavaj ab pradastaŭleńni palityčnaha prytułku Tarlecki źviarnuŭsia 5 maja 2016.
U svajoj ankiecie jon pakazaŭ, što byŭ vymušany pakinuć svaju krainu pa palityčnych i sacyjalnych pryčynach, pakolki arhanizoŭvaŭ hiej-prajd u Minsku i vystupaŭ suprać dyskryminacyi seksualnych mienšaściaŭ.
«Pazoŭnik pakazaŭ, što jon byŭ adpraŭleny ŭ psichijatryčnuju lakarniu z dyjahnazam šyzafrenija praz toje, što jon pracavaŭ travieści-dzivaj u kłubach», — havorycca ŭ sudovym rašeńni.
Mihracyjnaja słužba nie znajšła padstaŭ dla pradastaŭleńnia Tarleckamu statusu biežanca. Jon abskardziŭ hetaje rašeńnie ŭ sudzie.
Sud nie znajšoŭ dokazaŭ prymusovych mier miedycynskaha charaktaru aktyvista ŭ psichijatryčnaj ustanovie, a taksama paćviardžeńniaŭ raspačatych kryminalnych spraŭ suprać jaho ŭ Biełarusi.
Akramia taho, Mihracyjnaja słužba pakazała ŭ sudzie, što pazoŭnik zarablaje va Ukrainie, pakolki vystupaje ŭ jakaści travieści-dzivy pad psieŭdanimam Madam Žu-Žu.
«Zychodziačy z vyšej skazanaha, sud pryjšoŭ da vysnovy, što pazoŭnik dobraachvotna pakinuŭ krainu ŭ pošukach lepšaj doli i imkniecca pavysić uzrovień materyjalnaha dabrabytu i palepšyć umovy pracy i svoj uzrovień žyćcia», — vyrašyŭ sud.
