U Biełarusi ŭskładniajuć ekzamien na pravy dla matacyklistaŭ

U Biełarusi ŭskładniajuć ekzamien na pravy dla matacyklistaŭ. Adpaviednaja pastanova MUS ad 2 kastryčnika 2017 hoda №280, jakaja ŭnosić źmieny ŭ Instrukcyju ab paradku pryjomu kvalifikacyjnych ekzamienaŭ na prava kiravańnia miechaničnym transpartnym srodkam (za vyklučeńniem kołavaha traktara), apublikavanaja siońnia na Nacyjanalnym pravavym internet-partale. Pastanova ŭstupić u siłu praz 6 miesiacaŭ paśla apublikavańnia, paviedamlaje BIEŁTA.

Pravierka navykaŭ kiravańnia matacykłam ažyćciaŭlajecca na śpiecyjalnaj placoŭcy. Ekzamienavany pavinien u motaekipiroŭcy (motašlem, motapalčatki, nakaleńniki, nałakotniki) vykanać paśladoŭna nastupnyja elemienty — ruch pa pramoj ź pieraklučeńniem pieradač ź nižejšaj na vyšejšuju i naadvarot; kiravańnie na minimalnaj chutkaści («kalejnaja doška»); vykanańnie razvarotaŭ małoha radyusa (habarytnyja «vaśmiorka»); vykanańnie pavarotaŭ małoha radyusa (habarytnyja «źmiejka»); manieŭravańnie va ŭmovach abmiežavanaha času («manieŭravańnie»); tarmažeńnie i spynieńnie pry ruchu na druhoj chutkaści.

Pierad pačatkam vykanańnia elemienta «manieŭravańnie» ekzamienavany pavinien spynić transpartny srodak na adlehłaści nie bolš za 0,5 m ad linii pačatku vykanańnia elemienta («start») pa piarednim habarytach transpartnaha srodku. Čas dla vykanańnia elemienta nie bolš za 7 siekund. Časavy adrezak zamiarajecca pa faktyčnym pierasiačeńni piarednim habarytam transpartnaha srodku linii «start» i zadnim habarytam linii zakančeńnia vykanańnia elemienta («finiš»).

Elemient praktyčnaha ekzamienu na matacykle ličycca niavykananym, kali ekzamienavany dvojčy nie zmoh pieraklučyć pieradaču ź nižejšaj na vyšejšuju i (abo) naadvarot; zakranuŭ abmiežavalny konus (stojku), vyjechaŭ za miežy elemienta; adchiliŭsia ad zadadzienaj trajektoryi pry vykanańni elemientaŭ habarytnaja «źmiejka», «manieŭravańnie»; pieravysiŭ ustanoŭleny limit času pry vykanańni elemienta «manieŭravańnie»; pry vykanańni tarmažeńnia pierasiok stop-liniju abo spyniŭsia na adlehłaści bolš za 0,5 m ad stop-linii (pa prajekcyi piaredniaha habarytu).

Praktyčny ekzamien na matacykle ličycca nie zdadzienym u vypadkach, kali ekzamienavany nie vykanaŭ adzin z elemientaŭ; admoviŭsia ad vykanańnia elemienta; dapuściŭ padzieńnie matacykła; apuściŭ nahu z padnožki padčas ruchu; dvojčy zahłušyŭ ruchavik pry kranańni ź miesca; dvojčy nie zmoh vyklučyć pieradaču pry spynieńni z pracujučym ruchavikom.

Akramia taho, u Instrukcyju ab paradku pryjomu kvalifikacyjnych ekzamienaŭ na prava kiravańnia miechaničnym transpartnym srodkam ŭniesieny i inšyja źmieny. Jak i raniej, asoba, jakaja zdała tearetyčny ekzamien, dapuskajecca da zdačy praktyčnaha ekzamienu na praciahu nastupnych 6 miesiacaŭ, paśla zakančeńnia jakich tearetyčny i praktyčny ekzamieny pryznačajucca znoŭ. Adnak ciapier u dadzienym vypadku pry pryznačeńni praktyčnaha ekzamienu ŭličvajecca kolkaść papiarednich sprob i pieryjad času, jaki prajšoŭ z apošniaj sproby.

Taksama prapisana, što padčas praktyčnych vyprabavańniaŭ pa patrabavańni ekzamienavanaha pradastaŭlajecca dla aznajamleńnia adpaviednaja karta vyprabavalnaha maršrutu. U vypadku adchileńnia ad vyprabavalnaha maršrutu ekzamienatar infarmuje pra heta ekzamienavanaha i daje ŭkazańnie ab viartańni na maršrut.

• 0
• 0
• 0
• 0
• 0
• 0
• 0
• 0