«Financial Times» nadrukavała pa vynikach hutarki z aficyjnym kiraŭnikom Biełarusi davoli źjedlivy artykuł. Žurnalist ź niedavieram uspryniaŭ mnohija vykazvańni Alaksandra Łukašenki. Jon cytuje akurat tyja słovy Łukašenki, jakija pakazvajuć jaho jak čałavieka, što tak i nie navučyŭsia pavažać pravy asoby i ŭłaśnika: «Investaraŭ, jakija ŭkładajuć srodki ŭ stvareńnie svaich daččynych kampanij z nula, taksama sustrenuć haścinna. «Paradačnym» biznesoŭcam navat daduć darmavyja działki ziamli pad budoŭlu damoŭ, «kab jany mahli žyć nie na krai Eŭropy, jak u Londanie, a ŭ centry Eŭropy», — kpić «Financial Times».
U adroźnieńnie ad biełaruskich słuchačoŭ, zachodniamu žurnalistu ŭ zajavach i navat humary Alaksandra Łukašenki pieradusim kidajucca ŭ vočy tyja momanty, ź jakich praśviečvaje falš, samavolstva i pierakruty.
Aficyjny kiraŭnik Biełarusi daŭ učora interviju hazetam «Financial Times» i «Frankfurter Allgemeine Zeitung». Prośba ab interviju sychodziła ad biełaruskich uładaŭ. Vyhladaje, što jaho zaduma sychodziła ad Cima Beła, jaki zajmajecca pijaram biełaruskaha ŭradu na Zachadzie.
