U Biełarusi źnik jašče adzin hramadzianin Ukrainy — biełaruskija śpiecsłužby zatrymali kiraŭnika pradpryjemstva PAO «Zavod uciažarvalnikaŭ» (h.Kanstancinaŭka Danieckaj vobłaści), paviedamlaje Biełsat.
Pra heta havorycca ŭ liście na imia ambasadara Ukrainy ŭ Biełarusi Ihara Kizima ad 16 listapada, jakoje jość u rasparadžeńni kijeŭskaha vydańnia «Levy bierah» (LB.ua.)
U zvarocie, padpisanym v.a. staršyni praŭleńnia hetaha zavoda A. Kaźmienkam, śćviardžajecca, što dyrektar PAO «Zavod uciažarvalnikaŭ» Skiba Alaksandr Siarhiejevič prybyŭ u Miensk 15 listapada ŭ kamandziroŭku na pieramovy z AAT «Mienski traktarny zavod», ź jakim va ŭkrainskaha pradpryjemstva isnuje damova ab pastaŭkach pradukcyi, jakaja vykarystoŭvajecca ŭ liciejnaj vytvorčaści biełaruskaha zavoda.
Skiba vylecieŭ z Kijeva ŭ Miensk rejsam 15 listapada ŭ 14.20 i prybyŭ tudy ŭ 16.15 taho ž dnia pa miascovym časie. Nazad viarnucca jon źbiraŭsia ŭ toj ža dzień, pra što jon paviedamiŭ pa telefonie ŭ 19.20.
Adnak u nastupny raz na suviaź Skiba vyjšaŭ užo ranicaj — jon patelefanavaŭ žoncy z čužoha biełaruskaha numaru i paviedamiŭ, što jaho zatrymali supracoŭniki KDB Biełarusi.
«Sprabujučy daviedacca los našaha supracoŭnika ja źviarnuŭsia pa telefonie, znojdzienaha ŭ interniecie, da apieratyŭnaha dziažurnaha Upraŭleńnia KDB Biełarusi ŭ h.Miensk z zapytam u zatrymańni našaha supracoŭnika. Čałaviek, jaki pradstaviŭsia namieśnikam apieratyŭnaha dziažurnaha, paćvierdziŭ mnie fakt utrymańnia našaha supracoŭnika ŭ hetaj ustanovie », — havorycca ŭ liście.
Pry hetym pradstaŭnik KDB Biełarusi nie paviedamiŭ padziej i mety zatrymańnia, paabiacaŭšy pieratelefanavać kali ŭźniknie takaja nieabchodnaść.
Jak viadoma, 25 kastryčnika ŭ Minsku byŭ zatrymany karespandent Ukrainskaha Radyjo, hramadzianin Ukrainy Pavieł Šarojka. Jamu pradjaŭlenaje abvinavačańnie ŭ špijanažy.
Ciapier čytajuć
Tur abiacaje kampramat na tych, chto praz tyktok skardzicca na ŭłady18
Kamientary