Čarhovym hościem Intelektualnaha kłuba Śviatłany Aleksijevič stanie Alaksiej Masłaŭ, pradstaŭleny jak «uschodaznaŭca, prafiesar, doktar navuk i akademik».
«Masłaŭ šmat u čym asoba lehiendarnaja. Jon — hienieralny sakratar Mižnarodnaj fiederacyi šaalińskich bajavych mastactvaŭ, pieršy ź jeŭrapiejcaŭ, jaki prajšoŭ navučańnie ŭ Akademii ušu manastyra Šaaliń i atrymaŭ poŭnaje paśviačeńnie i imia Šy Sinjin («Vandroŭny aroł»), staŭšy paśviečanym paśladoŭnikam šaalińskaj tradycyi ŭ 32-m pakaleńni», — havorycca ŭ anonsie sustrečy.
Masłaŭ maje vystupić 27 listapada ŭ kanfierenc-zale haścinicy «Biełaruś», parazvažać na temy Azii i Kitaja dy papularna raskazać pra kitajskuju kulturu i handlovuju ekspansiju.
«Naša Niva» pacikaviłasia asobaj novaha śpikiera Intelektualnaha kłuba. Vyhladaje, što heta čałaviek ź vielmi nieadnaznačnaj navukovaj reputacyjaj.
Najpierš, jon «akademik» RAJEN. Ale RAJEN — heta faktyčna drukarnia, jakaja za hrošy štampuje paśviedčańni «akademikaŭ», «členaŭ-karespandentaŭ» i «prafiesaraŭ». RAJEN nazvaj mimikryruje pad aŭtarytetnuju RAN — Rasijskuju akademiju navuk, — ale sama navukovaj ustanovaj nie źjaŭlajecca.
Niekali my pisali, jak RAJEN vydavała zvańnie «załatoj kafiedry» Viciebskaj vieterynarnaj akademii — našaj Redakcyi jany hatovyja byli vydać takuju samuju za adpaviednuju płatu.
Čytajcie taksama: Adkul u viciebskim univiersitecie ŭziałasia psieŭdanavukovaja «Załataja kafiedra Rasii»
Aproč taho, što Masłaŭ nie akademik, cikava vyhladaje jaho publicystyčny šlach: u 1990-ch jon adna za adnoj vydavaŭ knihi pra ušu, inšyja bajavyja kultury Kitaja i Cyhun, tady ž abaraniŭ doktarskija stupieni — jany potym trapili ŭ pole zroku rasijskich zmaharoŭ ź psieŭdanavukaj, jakija vykryli, što navukovyja raboty, zajaŭlenyja ŭ aŭtarefieratach Masłava, nie isnujuć.
Potym, u 2000-ja, Masłaŭ radykalna pašyryŭ svaje navukovyja intaresy, pačaŭšy pisać knihi inšaha profilu.
«Druhoje čałaviectva. Tut niechta pabyvaŭ da nas», «Mudracy Atłantydy», «Dychańnie Šambały», «Zahadki, tajamnicy i kody cyvilizacyi Majia», — voś niekatoryja z tvoraŭ Masłava.
Varta taksama adznačyć, što niekatoryja knihi z najbolš navukapadobnymi zahałoŭkami, pa słovach samoha Masłava, u adkrytym dostupie nie isnujuć, bo «rukapisy kanfiskavanyja KDB».
Hety čałaviek nieadnarazova traplaŭ pad krytyku sapraŭdnych akademikaŭ i daśledčykaŭ kultur Uschodu, isnuje navat sajt, dzie raźbirajucca ŭsie jaho rehalii — stvorany, vidać, kimści z akademičnaj tusoŭki.
Admietna, što i artykuł pra jaho na Vikipiedyi papiaredžvaje pra «vyrazny rekłamny charaktar».
Ci nie moža taki vybar śpikiera naškodzić samoj idei Intelektualnaha kłuba?
My spytalisia pra heta ŭ Śviatłany Aleksijevič.
«Masłaŭ ličycca ŭ Vyšejšaj škole ekanomiki śpiecyjalistam. Ja čuła dobraje mierkavańnie pra jaho, Masłava nazvali, kali ja stała navodzić daviedki pra najlepšaha znaŭcu Kitaja. U jaho papularnyja lekcyi, cikavyja dumki pra śviet Azii, što nam i treba.
I ja daviaraju lektaram, jakich zaprašajuć u Škołu ekanomiki. I Ulickaja chvaliła jaho, jašče chtości… I heta naturalna, što pra jaho buduć i kiepskija vodhuki, pra mianie taksama šmat čaho pišuć u internecie.
Nie chaciełasia b, kaniečnie, kab u temie Azii my akazalisia ŭ rukach paviarchoŭnaha čałavieka. Davajcie sami pahladzim i zrobim vysnovy. Bo admianiać sustreču my ŭžo nie budziem, kaniečnie», — skazała nam Śviatłana Aleksijevič.
