Biskupy Biełarusi padtrymali inicyjatyvu katalickich viernikaŭ uvieści vychadny dzień dla ŭšanavańnia pamiaci pamierłych. Pytańnie było abmierkavana na plenarnym pasiadžeńni jepiskapatu 21 listapada.
Ad imia Kanfierencyi Katalickich Biskupaŭ u Biełarusi i pa jaje daručeńni admysłovy list Alaksandru Łukašenku nakiravaŭ staršynia jepiskapatu Biełarusi arcybiskup Tadevuš Kandrusievič.
Pra heta ijerarch paviedamiŭ u kamientaryi Catholic.by. Pavodle jaho słoŭ, u mnohich krainach śvietu 1 listapada źjaŭlajecca vychadnym dniom.
«1 listapada Katalicki Kaścioł va ŭsim śviecie adznačaje ŭračystaść Usich Śviatych. U hety dzień my taksama naviedvajem mohiłki, i pa tradycyi ŭžo viečaram hetaha dnia nabaženstvy celebrujucca ŭ intencyi pamierłych, vielmi časta — na mohiłkach», — adznačyŭ arcybiskup Kandrusievič.
Ijerarch dadaŭ, što ŭ šerahu krain śvietu, dzie žyvuć katoliki i pratestanty, 1 listapada na dziaržaŭnym uzroŭni zrobleny vychadnym dniom, što adpaviadaje kaścielnaj tradycyi.
«Dzień usich pamierłych my pačynajem adznačać 1 listapada. Kali hety dzień budzie volnym, jon stanie dobraj nahodaj pamalicca nie tolki ŭ kaściole, ale i na mohiłkach. Razam z tym heta pryviadzie da bałansu z Pravasłaŭnaj Carkvoj, dzie vierniki majuć vychadny dzień — Radaŭnicu».
Arcybiskup Tadevuš Kandrusievič dadaŭ, što z padobnymi prapanovami źviartalisia ŭ jepiskapat Biełarusi i śvieckija vierniki.
«U Biełarusi žyvie šmat źmiešanych siemjaŭ — katolikaŭ i pravasłaŭnych. U takich siemjach heta pytańnie adčuvajecca jašče bolš vostra: pravasłaŭny moža pajści i pamalicca ŭ hety dzień na mohiłki, a ŭ katolikaŭ — heta rabočy dzień», — nahadaŭ Mitrapalit.
Žychary Homiela źbirajuć podpisy pad zvarotam z prapanovaj zrabić Dziady niepracoŭnymi dniami
