Repietytar Jaŭhien Liviant vykłaŭ u internet kopiju rasparadžeńnia adździeła adukacyi Vaŭkavyskaha rajvykankama da kiraŭnikoŭ škoł i sadkoŭ rajona.
U tym dakumiencie davodzicca płan padpiski na «Sovietskuju Biełoruśsiju», «Nastaŭnickuju hazietu», «Hrodzienskuju praŭdu», «Naš čas»: tam navat raśpisana, kolki supracoŭnikaŭ ustanovy adukacyi kolki i jakich mienavita haziet majuć vypisać.
Padsumoŭvajecca heta matyvujučaj frazaj:
«Źviartaju vašu ŭvahu, što płan na padpisku dadzieny z ulikam taho, što viedamstviennaja padpiska nie vykonvajecca i my pavinny jaje pierakryć!!!!!».
Pad dakumientam staić imia načalnicy tamtejšaha adzieła adukacyi Taćciany Hazizavaj.
«Naša Niva» pazvaniła čynoŭnicy z pytańniem pra sens takich płanaŭ. My pierapytali taksama, ci sapraŭdy ŭ adździele adukacyi bolš niama raboty, jak vyvodzić hrafiki padpiski, a potym ich adsočvać.
Pryvodzim frahmienty dalejšaj razmovy:
— Chto-chto vy? (Zapisvaje imia). Dyk u čym, jašče raz, sutnaść pytańnia?
— Čamu hetaja praktyka isnuje? Čamu vy takija prymusy vysyłajecie?
— A chiba ž heta prymus? Vy pahladzicie ŭvažliva. Tam napisana, što my zahadvajem?
— Davajcie nie budziem raskazvać adzin adnamu aniekdoty i davodzić, što ŭ našaj sistemie kaardynat słova «rekamiendacyja» z vykankama aznačaje rekamiendacyju, a nie zahad.
— Nichto nikomu nie zahadvaje. Tam niama słova «zahadvajem».
— Dyk navošta vy im «rekamiendujecie» padpisvacca?
— Padpisvacca dla taho, kab čytać. Ja jašče raz pytajusia, tam jość słova «zahad»? Ja nie baču, pra što tut bolš havaryć, da pabačeńnia.
Varta taksama zhadać, što niejki čas tamu piśmieńnica Jaŭhienija Pasternak pisała zapyt u Administracyju prezidenta z prośbaj patłumačyć miechanizm i sens nastaŭnickich padpisak, na što pryjšoŭ adkaz, što takoha abaviazku niama.
