Mužčyny z kałami i ščytami ŭ centry Kijeva: ukrainskija pravaachoŭniki heta dazvalajuć. Fota Pravda.com.ua.
Prychilniki Ruchu novych sił Micheiła Saakašvili pastavili namioty ŭ Maryinskim parku kala budynka Viarchoŭnaj Rady Ukrainy. Jany praviali tam noč. Kala 6-j ranku namioty inśpiektavali siłaviki: mahčyma, jany šukali samoha Saakašvili, vypisany ordar na jahony aryšt.
Prychod 200 siłavikoŭ vyklikaŭ sutyčki z pratestoŭcami, adnamu mužčynu tvar raźbili ŭ kroŭ.
Sam Saakašvili noč pačaŭ u namiotach, a skončyŭ u adnym z susiednich hatelaŭ, paviedamlajuć ukrainskija ŚMI.
Słužba biaśpieki Ukrainy abvinavaciła palityka «ŭ sadziejničańni ŭdzielnikam złačynnych arhanizacyj i ŭtojvańni ich złačynnaj dziejnaści». Śćviardžajecca, što Saakašvili ŭvajšoŭ u kantakty z ahientami Rasii i byłym ukrainskim ministram pa padatkach i zborach Kurčankam, jaki chavajecca ŭ Rasii i padazrajecca ŭ zdradzie radzimie.
Saakašvili pracavaŭ va Ukrainie z 2014 hoda. Jon padtrymaŭ revalucyju Jeŭramajdanu, paśla jaje byŭ hubiernataram Adeskaj vobłaści, ale nie zmoh ani zavajavać prychilnaść tamtejšych biznes-kołaŭ, ani likvidavać karupcyju. Ad 2016 jon staŭ aktyŭnym krytykam prezidenta Piatra Parašenki. U 2017 jon ujechaŭ va Ukrainu nasupierak zabaronie na ŭjezd. Krytyki abvinavačvajuć jaho ŭ biazdumnym papuliźmie. Rejtynh padtrymki jahonaha Ruchu novych sił va Ukrainie nie pieravyšaje 2%. Na mitynhi za impičmient Piatra Parašenki Saakašvili sabraŭ kala 2000 čałaviek.
Apošnija miesiacy rasijskaja prapahanda aktyŭna tyražavała krytyku Saakašvili na adras Parašenki. Eks-prezident Hruzii abvinavačvaŭ prezidenta Ukrainy i jaho asiarodździe ŭ karupcyi.
***