Premijaj imia Franciška Alachnoviča ŭhanaravali čatyroch byłych palitviaźniaŭ
Łaŭreatami premii 2017 hodu za turemnuju litaraturu stali Mikoła Dziadok, Źmicier Drozd, Andrej Sańnikaŭ i Leanid Piatrenka, paviedamlaje Radyjo Svaboda.
Premija imia Franciška Alachnoviča zasnavanaja Radyjo Svaboda i Biełaruskim PEN-centram. Jana prysudžajecca aŭtaram, jakija byli źniavolenyja ci znachodziacca ŭ turmie.
Viadoŭca imprezy, paet i pierakładčyk Andrej Chadanovič skrušna zaŭvažyŭ, što chaciełasia b, kab turemnaja tema ŭ litaratury straciła aktualnaść. Ale hetaha, na žal, nia zdaryłasia.
Dyrektar Biełaruskaj słužby Radyjo Svaboda Alaksandar Łukašuk paviedamiŭ, što redakcyja atrymała bolš za tuzin tvoraŭ, ale nia ŭsie jany buduć uznaharodžanyja i navat zhadanyja.
Laŭreatami premii imia Franciška Alachnoviča stali:
- Mikoła Dziadok za knihu «Farby paralelnaha śvietu»
- Źmicier Drozd za knihu «Bunt batanikaŭ»
- Andrej Sańnikaŭ za knihu «Maja historyja»
- Leanid Piatrenka za knihu paezii «Kamernyja sny».
Adzin ź ciapierašnich laŭreataŭ Mikałaj Dziadok pravioŭ za kratami amal 5 hadoŭ pa tak zvanaj spravie «anarchistaŭ», pałovu terminu — u adzinočkach, ŠYZA. Ciapier jon vučycca ŭ Koŭnie i nia zmoh pryjechać na imprezu. Tamu baćka Mikoły Alaksandar Dziadok pračytaŭ na imprezie ese z knihi «Žyćcio cudoŭnaje».
Źmicier Drozd, aŭtar knihi «Bunt batanikaŭ» — archivist. Jon taksama pračytaŭ frahment sa svajoj knihi i skazaŭ, što piša asobnyja tvory pra Piščałaŭski zamak, pra Dunina-Marcinkieviča.
Cieść Andreja Sańnikava, kinascenaryst Uładzimier Chalip začytaŭ kranalny ŭryvak pra toje, jak Sańnikaŭ pisaŭ u turmie kazki dla Danika, maleńkaha syna Andreja i Iryny. Adna kazka była pra maleńkaje myšaniatka, jakoje ŭciakała, — i list ź joj zatrymali, bo, jak skazaŭ načalnik turmy, kazka była pra ŭcioki…
Adzin ź laŭreataŭ premii Leanid Piatrenka siońnia za kratami, jon asudžany na 10 hadoŭ. Jahonuju knihu «Kamernyja sny» pradstavili siabry, u tym liku mastak Uładzimier Ceśler — aŭtar vokładki. «Lonia — hłyboka prystojny čałaviek, tamu nia dziva, što jon siadzić», — skazaŭ spadar Ceśler.
Na imprezie adznačyli jašče dva vydańni, źviazanyja z staršyniom pravaabarončaha centru «Viasna» Alesiem Bialackim, jaki ŭžo byŭ laŭreatam premii Alachnoviča ŭ 2014 hodzie za knihu «Irtutnaje srebra žyćcia».
«Listy salidarnaści» — zbornik tekstaŭ, napisanych Bialackim u babrujskaj kalonii, dzie jon siadzieŭ u 2012—2014 hadach. Za dva z pałovaj hady adsiedki Bialacki atrymaŭ bolš za 20 tysiač listoŭ z usiaho śvietu.
«Albom salidarnaści» vydadzieny pravaabarončym centram «Viasna» razam sa švedzkaj Östgruppen. Heta historyja źniavoleńnia i vyzvaleńnia palityčnaha viaźnia Alesia Bialackaha praciahłaściu 1052 dni.
Knihi pradstavili pravaabaroncy «Viasny» Iryna Prakopčyk i Siarhiej Sys.
Pieršym laŭreatam premii Alachnoviča ŭ 2013 hodzie staŭ tahačasny palitviazień Ihar Alinievič za knihu «Jedu v Mahadan». U 2014 hodzie premiju atrymali adrazu šeść aŭtaraŭ: Aleś Bialacki — za «Irtutnaje srebra žyćcia», Źmicier Daškievič — za knihu «Čarviak», Feliks Piekier — za «10 let i 1 dień Ihoria Savčienko», Pavał Sieviaryniec — za «Biełaruskuju hłybiniu», Alaksandar Fiaduta — za «Moj maleńkij Pariž», Iryna Chalip — za «Dziońnik zečki».
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju28
Kamientary