U Maskvie abviaścili łaŭreataŭ litaraturnaj premii «Bolšaja kniha», paviedamlaje lenta.ru.
Fota TASS
Pieršaje miesca (premija 3 młn rasijskich rubloŭ — 50 tys. dalaraŭ) uziaŭ Leŭ Daniłkin z knihaj «Lenin. Pantokrator sołniečnych pylinok». Kniha napisana jak bijahrafija, ale niezvyčajna padadzienaja. Daniłkin užo napisaŭ bijahrafii Haharyna i Alaksandra Prachanava.
U «Leninie» hałoŭny hieroj paŭstaje jak padarožnik-ravaryst, dendzi, palaŭničy. Kniha składajecca z raździełaŭ, dzie žyŭ pravadyr suśvietnaha praletaryjatu: Simbirsk, Šušanskaje, Samara, Curych, Ženieva, Miunchien, Pietrahrad. Maniera padačy ŭ aŭtara niazmušanaja. Voś jak Daniłkin apisvaje vydańnie haziety «Iskra».
«Iskra. Epizod 1 »- kłasičny siužet u styli «nuar»: hieroj-adzinočka vyzvalajecca z turmy, dzie daskanała praličvaje hałavakružnuju pomstu, - i, apynuŭšysia ŭ čužym horadzie, viadzie žyćcio marhinała, całkam addajučysia svajoj apantanaści; vybaru ŭ jaho niama: adziny sposab zdabyć stračanuju identyfikacyju - stvaryć niešta, što strasianie śviet.
Vydavać hazietu tearetyčna možna było i ŭ Rasii, vykarystaŭšy nazapašany vopyt nielehalnych ŚMI, — ale toje była zaviedama suicydalna, matylkovaja dziejnaść: palicyja rana ci pozna, pryčym chutčej rana, dabiarecca da redakcyi. Dvajnaja abarona - padpolle + emihracyja - zdavałasia Uljanavu bolš pierśpiektyŭnaj: biznes viadziecca ŭ Rasii, hrošy pastupajuć adtul, a zamiežža — niešta nakštałt afšoru, biaśpiečnaha miesca, adkul, karystajučysia sistemaj falšyvych dakumientaŭ i padstaŭnych asob, možna nie płacić palityčny padatak dziaržavie. Biaśpieku, zrazumieła, možna było harantavać tolki redakcyi. Štuka była ŭ tym, kab nie paŭtaryć pamyłku Plachanava: lehalizavacca ŭ ramkach jeŭrapiejskaha sacyjalistyčnaha ruchu, nie «adarvacca» ad Rasii; treba było nie prosta źziać — ale i kałamucić tam vadu: niama partyjnaj prahramy - voś vam hatovaja; aryštavali členaŭ partkamiteta - padbiarom novych, nie viedajecie, jak napisać ulotku dla niezadavolenych rabočych, — dašlem materyjały».
