U Viciebsku vyniesieny prysud žančynie (1988 hoda naradžeńnia), jakaja ŭ siamiejnaj svarcy zabiła muža. Viadoma, što padstavaj dla svarki z mužam, jaki na 5 hadoŭ starejšy za jaje, stała reŭnaść. Apošniaj kroplaj stali stasunki muža ź inšymi žančynami ŭ internecie, paviedamlaje vitebsk.biz.
U maładoj siamji, jakaja pražyvaje ŭ Viciebsku ŭ mikrarajonie Bileva, časta zdaralisia kanflikty. Spačatku z-za hrošaj. Žančyna paprakała muža, što jaho nievysokich zarobkaŭ nie chapaje na ŭtrymańnie siamji. Mužčyna znajšoŭ dobruju pracu vachtavym mietadam u Rasii. U siamji naradziłasia dzicia. A kanflikty praciahvalisia.
Žančyna stała padazravać muža ŭ zdradach. Jana ličyła, što toj u Rasii zavioŭ sabie paluboŭnicu. Muž adkazvaŭ uzajemnaściu, taksama ličačy, što žonka ŭ jaho adsutnaść «chodzić naleva».
— U 2011 hodzie žančyna padčas siamiejnaj svarki schapiła nož i ŭdaryła im muža, — raspavioŭ prakuror adździeła prakuratury Viciebskaj vobłaści Anton Harochaŭ. — Pryčym padziei razhortvalisia na vačach u ich čatyrochhadovaj dački. Mužčyna atrymaŭ ciažkija cialesnyja paškodžańni, ale žyćciova važnyja orhany nie byli zakranutyja. Napadnica była asudžanaja da troch hadoŭ abmiežavańnia voli biez nakiravańnia ŭ papraŭčuju ŭstanovu.
Ale navat paśla hetaha ŭ adnosinach muža i žonki ničoha nie źmianiłasia.
— U adzin z krasavickich dzion 2017 žančyna z mužam z ranicy raśpivali śpirtnyja napoi, — raspaviadaje Anton Harochaŭ. — Dniom da bankietu padklučylisia susiedzi. Viečaram usia kampanija vyrašyła praciahnuć adpačynak u saunie. Ale muž žančyny admoviŭsia tudy iści. Jon skazaŭ, što choča pabyć z dačkoj. Kali abvinavačanaja pryjšła pozna ŭnačy dadomu, jana zaśpieła muža za kampjutaram. Ubačyła, što jon pierapisvajecca ŭ internecie ź inšymi žančynami. Stała vinavacić muža z nahody virtualnych i realnych zdrad. Toj admaŭlaŭ svaju vinu. Tady žonka schapiła nož i mocna ŭdaryła muža ŭ hrudnuju kletku. Mužčyna ŭpaŭ na śpinu, zmoŭk i pierastaŭ varušycca.
Žančyna pamacała ŭ jaho puls. Zrazumieŭšy, što muž miortvy, adpraviłasia da susiedziaŭ, dzie paviedamiła pra zdareńnie. Supracoŭnikam pravaachoŭnych orhanaŭ jana cynična pryznałasia, što raniej «užo adzin raz rezała muža, ale nie darezała».
Za zabojstva sud pryznačyŭ žančynie 1988 hoda naradžeńnia pakarańnie ŭ vyhladzie 12 hadoŭ pazbaŭleńnia voli z adbyvańniem u papraŭčaj kałonii va ŭmovach ahulnaha režymu.
Kamientary