U Biełarusi zaćvierdžanaja Daktryna nacyjanalnaj charčovaj biaśpieki da 2030 hoda.
Jaje aŭtary źviartajuć uvahu na šerah pahroz.
U pryvatnaści, kanstatujecca vysokaja dola dachodaŭ (41,9% stanam na 2015 hod), jakuju biełarusy vydatkoŭvajuć na ježu. U płanach panizić hety pakazčyk da 35%.
«U vypadku zachavańnia tendencyi rostu cenaŭ charčavańnie hramadzian ź nizkimi dachodami (niepracujučyja piensijaniery, šmatdzietnyja siemji, siemji ź dziećmi) moža stać niedastatkova paŭnavartasnym», — havorycca ŭ daktrynie.
«Najbolš uraźlivymi da pahroz charčovaj biaśpieki zastajucca chatnija haspadarki ź dziećmi. U 2015 hodzie chatnimi haspadarkami z adnym dziciem spažyvałasia ŭ raźliku na člena siamji ŭ hod 71 kiłahram miasa i 14 kiłahramaŭ ryby, z dvuma dziećmi — 60 i 12, z tryma dziećmi — 58 i 11 kiłahramaŭ adpaviedna. U siemjach z tryma dziećmi adznačana samaje vysokaje spažyvańnie bulby. Značnymi zastajucca adroźnieńni ŭ racyjonie charčavańnia haradskoha i sielskaha nasielnictva. Pa dadzienych za 2015 hod, uzrovień spažyvańnia małakapraduktaŭ na siale na 28 kiłahramaŭ nižej, miasa — na 6, sadaviny i jahad — na 23 kiłahramy. Chleba ŭ sielskaj miascovaści spažyvajuć bolš na 24 kiłahramy. Pryčynaj hetamu źjaŭlajucca niedastatkovyja dla jakasnaha charčavańnia ŭzrovień dachodaŭ sielskaha nasielnictva i efiektyŭnaść charčovaha zabieśpiačeńnia terytoryj», — taksama kanstatuje daktryna.
Ale najbolš pakazalnaja taja statystyka, što demanstruje roźnicu ŭ prybytkovaści kałhasnaj sistemy, što dastałasia Biełarusi ŭ spadčynu ad SSSR, i pryvatnych fiermierskich haspadarak.
U 2015 hodzie rentabielnaść u fiermieraŭ składała 31,1%, u toj čas jak u kałhasach — tolki 0,6%.
Aŭtary daktryny pry hetym adznačajuć, što «na strukturu i dynamiku rynkaŭ sielskahaspadarčaj pradukcyi, syraviny i charčavańnia značny ŭpłyŭ akazvaje ahrarnaja palityka, u pieršuju čarhu — uzrovień dziaržaŭnaj padtrymki».
Razam z hetym davodzicca, što «u niekatorych rajonach Biełarusi skłałasia krytyčnaja situacyja z kolkaściu stratnych sielhaspradpryjemstvaŭ».
