Supiarečlivyja naviny prychodziać ź Siryi. Rasijski telehram-kanał Directorate 4, što śpiecyjalizujecca na navinach ź siryjskaj vajny, apublikavaŭ fota biełarusa, jaki moh zahinuć jašče ŭ siaredzinie śniežnia.
Na fota jon padpisany jak «Abu Safija Biełarusi». Zdymak źmiaścili hrupoŭki bajevikoŭ, jakija bazujucca ŭ Idlibie, i vajujuć jak suprać Isłamskaj dziaržavy, tak i suprać siryjskich uradavych vojskaŭ. U śpisie zahinułych u asnoŭnym kurdy i biełudžy, ale jość, padobna, i hramadzianin Biełarusi.
Viadoma, što ŭ Siryi byŭ inšy vychadziec ź Biełarusi — Abu Sałman Biełarusi. Hety čałaviek apošnim časam uznačalvaŭ hrupoŭku Malhama Tactical, jakuju nazyvali pieršaj pryvatnaj vajennaj kampanijaj u Siryi.
Zasnavaŭ Malhama Tactical uźbiek Abu Rafik. Słova «malchama» ŭ arabskaj movie značyć apošniuju kryvavuju bitvu. Hrupoŭka była vielmi aktyŭnaja ŭ sacyjalnych sietkach (Tvitar, Ukantakcie, Jutub). Navat źbirali hrošy na ŭzbrajeńnie kraŭndfandynham. Pamočnikami Abu Rafika taksama byli vychadcy z byłoha SSSR. Malhama Tactical zajmałasia padrychtoŭkaj bajevikoŭ.
Kali Abu Rafika zabili ŭ lutym sioleta, to jamu na źmienu pryjšoŭ Abu Sałman Biełarusi. Paviedamlałasia, što jon byŭ staršym siaržantam u 103-j bryhadzie PDV Viciebska. «Jon budzie treniravać i vyvodzić atrad na novy ŭzrovień bajavoj padrychtoŭki», — havaryłasia ŭ paviedamleńni.
Isnuje viersija, što zabitym jakraz moh być apošni. Sprava ŭ tym, što Malhama Tactical akurat u śniežni spyniła svajo isnavańnie. A ŭ niekrałohu prosta mahła być dapuščanaja pamyłka, što pieraŭtvaryła Abu Sałmana Biełarusi ŭ Abu Safiju Biełarusi.
***