Adzinota škodzić zdaroŭju
Ale hety pryŭźniaty nastroj achoplivaje nia ŭsich, bo niamała siarod nas ludziej stałych, adzinokich, jakija mocna pakutujuć ad adzinoty, asabliva ŭ śviaty, kali vakoł viruje žyćcio i viesiałość, a im časam niama z kim pieramovicca słovam.
U sučasnaj hierantalohii, navucy pra stareńnie čałavieka, adzinota ŭvažajecca adnym z najvažniejšych stanaŭ, jaki vynosicca na pieršyja miescy pavodle stupieni ŭpłyvu na zdaroŭje stałaha čałavieka. U navukovaj litaratury adzinotu paraŭnoŭvajuć i staviać u adzin šerah z takimi dobra viadomymi faktarami ryzyki sardečna-sudzinnych i nervovych zachvorvańniaŭ, jak kureńnie, atłuścieńnie, niedachop fizyčnaj aktyŭnaści, vysoki arteryjalny cisk.
Taksama viadoma, što ŭ adzinokich ludziej źnižana supraciŭlalnaść infekcyjnym chvarobam, u ich čaściej nazirajecca depresija, demencyja i bolš važkija zruchi pamiaci. Taksama ŭ adzinokich ludziej časta maje miesca pavyšanaja patreba u špitalizacyi, hetak ža jak i bolš praciahłaje znachodžańnie ŭ balnicy.
Hierantalohija ŭchvalaje lubyja formy sužyćcia i partnerstva ŭ staraści
Tłumačeńnie hetym źjavam dosyć prostaje. Sprava ŭ tym, što kali čałaviek žyvie ŭ šlubie ci maje inšyja formy sužyćcia, to rytm jahonaha žyćcia bolš uparadkavany, čałaviek rehularna charčujecca, dahladaje siabie, lepiej apranajecca, uvohule jamu jość dla kaho heta ŭsio rabić.
Vielmi važna dla stałaha čałavieka, što pobač ź inšym čałaviekam — mužam, žonkaj ci členam siamji, inšym partneram — jon ź imi razmaŭlaje, kamunikuje, reahuje na ŭčynki. A heta, u svaju čarhu, treniruje pamiać i pavyšaje zdolnaść da sacyjalnaha žyćcia.
Niezdarma siońnia ŭ medyčnaj i sacyjalahičnaj litaratury vielmi ŭchvalajucca lubyja prymalnyja dla čałavieka formy hramadzianskich sajuzaŭ, partnerstva ci šlubu, bo dakładna viadoma, što nieadzinoki čałaviek maje mieniej šancaŭ zachvareć na demencyju i patalohiju sardečna-sudzinnaj systemy.
Kryzis paśla 65 hadoŭ
Našy navukovyja supracoŭniki pad kiraŭnictvam kandydata sacyjalahičnych navuk Ł. U. Kołpinaj vyvučali stan adzinoty ŭ stałych ludziej.
Vyśvietliłasia, što paśla 65 hadoŭ mnohija ludzi pieražyvajuć sapraŭdny kryzis, bo ŭ hetym uzroście dzieci majuć svaje siemji i časta žyvuć daloka ad baćkoŭ. U mnohich zychodziać z žyćcia muž ci žonka, blizkija siabry, addalajucca svajaki. Stan adzinoty z zrazumiełych pryčyn stanovicca bolš vostrym pa miery pavieličeńnia ŭzrostu.
Taksama akazałasia, što paśla 70 hadoŭ u haradzkich umovach u stałych ludziej najbolš tryvałymi suviaziami źjaŭlajucca… ich susiedzi, na jakich jany ŭskładajuć šmat spadziavańniaŭ u sensie znosin. Mienavita z susiedziami jany mohuć abmiarkoŭvać niejkija padziei svajho i ahulnaha susiedzkaha žyćcia ŭ padjeździe ci dvary.
Addajcie čaścinku svajho ciapła starym
My pišam pra hetyja dosyć sumnyja temy ŭ śviaty dla taho, kab vy, pavažanyja čytačy, padumali pra adzinokich ludziej, bo jany vielmi spadziajucca na naša dobraje staŭleńnie, navat na nievialikuju razmovu, dobruju ŭśmiešku.
Źviarnicie ŭvahu na stałych adzinokich ludziej u hetyja śviaty — svaich svajakoŭ, susiedziaŭ, byłych sasłužyŭcaŭ, pavinšujcie ich z Novym hodam i Rastvom, nadajcie im chacia b niašmat łaskavaj uvahi, i vas sahreje čałaviečaja ŭdziačnaść i spadziavańnie na toje, što naš śviet u nastupajučym hodzie stanie lepiej!
Z Novym hodam vas, spadarstva, z novym ščaściem! I abaviazkova budźcie zdarovyja!
