Adrazu paśla Novaha hoda Alaksandr Łukašenka prysudziŭ premiju «Za duchoŭnaje adradžeńnie», jakaja ŭručajecca na pravasłaŭnaje Rastvo. Sioleta jaje ŭładalnikami stali try arhanizacyi i dźvie asoby.
Viktar Pierahudaŭ. Fota z sacyjalnych sietak.
Najbolš admietna, što adnym z łaŭreataŭ staŭ protaijerej Viktar Pierahudaŭ, nastajaciel prychoda chrama prapadobnaj Jeŭfrasińni Połackaj u miastečku Ivianiec Vałožynskaha rajona.
Ajcu Viktaru 60 hadoŭ, jon rodam z Vałožyna. Śviatarstvuje ŭžo bolš za 20 hadoŭ. Pa pieršaj adukacyi — mastak. Heta adbiłasia na jahonaj dalejšaj dziejnaści: užo dva razy ŭ Iviancy jon robić z Sajuzam mastakoŭ plener «Śviataść ziamli biełaruskaj».
Viktar Pierahudaŭ razmaŭlaje ŭ žyćci na biełaruskaj movie, taksama na joj słužyć u carkvie, pravodzić niadzielnuju škołku, razmaŭlaje ź viernikami.
U Iviancy ajciec Pierahudaŭ pabudavaŭ carkvu ŭ honar Jeŭfrasińni Połackaj, a taksama kryptavuju carkvu u honar śviatoha Miny, jepiskapa Połackaha. Stvaryŭ dom miłasernaści «Viktoryja» ŭ vioscy Pralniki, dzie apiakujecca dziećmi-invalidami ź Ivianieckaha domu-internata.
Ajciec Viktar maje stałyja suviazi ź biełaruskaj dyjasparaj. Naprykład, adzin z najbolš značnych dziejačaŭ emihracyi Janka Zaprudnik, naviedvajučy Biełaruś, štoraz pryjazdžaje ŭ ivianieckuju carkvu, dapamahaŭ pry budaŭnictvie i hrašovymi srodkami, i malitvaj.
Viktar Pierahudaŭ źviartaŭsia da mitrapalita Fiłareta, kab jon uznaharodziŭ Zaprudnika. U vyniku Zaprudnik byŭ uznaharodžany ordenam Kiryły Turaŭskaha ad BPC.
Ciapier ajciec Pierahudaŭ žyvie ŭ Rakavie. Maje dźviuch dačok.
Jašče adnu premiju atrymaŭ muftyj Musulmanskaha relihijnaha abjadnańnia Abu-Biekir Šabanovič. U 2016 u Minsku u tym liku namahańniami Šabanoviča była adkrytaja miačeć.
Taksama premijaj «Za duchoŭnaje adradžeńnie» adznačanyja Biełaruski sajuz žančyn, kalektyŭ Nacyjanalnaj biblijateki za pracu pa faksimilnym vydańni spadčyny Franciška Skaryny i kalektyŭ RNPC ankałohii i miedycynskaj radyjałohii imia Alaksandrava.