U Davosie horača abmiarkoŭvali ryzyki zvyšsučasnych technałohij
U Davosie adkryŭsia Suśvietny ekanamičny forum (SEF)— adna z najvažniejšych padziej 2018 hoda. Ale vialikaja častka pracy forumu adbyvajecca nie na hornych schiłach šviejcarskaha Davosa, a ŭ amierykanskim San-Francyska.
U apošnija hady členy forumu i klučavyja kampanii pieraklučyli svaju ŭvahu na ryzyki, źviazanyja z raźvićciom technałohij.
U pačatku 2017 hoda VEF naniaŭ Źvika Kryhiera, pasłanca Dziarždepartamienta ZŠA ŭ Kremnijevaj dalinie ŭ apošni hod praŭleńnia Baraka Abamy, i Murata Sienmieza, pradprymalnika z Kremnijevaj daliny, kab adkryć svoj pieršy bujny ofis za miežami Šviejcaryi z ambicyjnaj nazvaj «Suśvietny ekanamičny forum — Centr čaćviortaj pramysłovaj revalucyi». Filijał finansujuć takija pradpryjemstvy-hihanty, jak Salesforce i Microsoft.
Centr, naprykład, užo dapamoh Ruandzie raspracavać novuju nacyjanalnuju palityku, nakiravanuju na zapusk kamiercyjnaj industryi bieśpiłotnikaŭ. Jašče adzin prajekt Centra sumiesna z kampanijaj-raspracoŭščykam prahramnaha zabieśpiačeńnia dla mašyn nuTonomy zaklučajecca ŭ acency taho, jak haradskija ŭłady mohuć adaptavacca da bieśpiłotnych aŭtamabilaŭ.
Technałohii adbilisia ad ruk
Zasnavalnik SEF Kłaŭs Švab miarkuje, što my vyjšli za miežy kłasičnaha ličbavaha vieku i nablizilisia da niečaha bolš radykalnaha: źjaviŭsia štučny intelekt, pry dapamozie technałohij možna redahavać hieny.
Novyja technałohii, takija jak štučny intelekt, kryptavaluty i bieśpiłotnyja aŭtamabili, nastolki mocnyja, šyroka raspaŭsiudžanyja i raźvivajucca z takimi tempami, što mohuć vyjści z-pad kantrolu.
Heta i źjaŭlajecca padstavaj dla turbavańnia mnohich udzielnikaŭ forumu. «Kali my źbirajemsia budavać lepšaje hramadstva, nam patrebnyja nie tolki technałohii. My pavinny raźvivać ich pravilna i adkazna», — skazaŭ Endru Mejnard, dyrektar Inavacyjnaje łabaratoryi va Univiersitecie štata Aryzona.
Aŭtamatyzacyja moža pazbavić mnohich ludziej pracoŭnych miescaŭ. Internet rečaŭ z termastatami, aŭtamabilami i z usimi inšymi mažlivymi pryładami, padłučanymi da sietki, užo staŭ placoŭkaj dla chakieraŭ.
«U technałahičnaj prastory adbyvajecca niešta hrandyjoznaje, i treba niešta z hetym rabić. Ale, pa-pieršaje, my nie razumiejem, što mienavita adbyvajecca, i, pa-druhoje, my nie viedajem, što rabić. Pra heta kažuć i prezidenty, i premjer-ministry, i členy ŭrada», — kaža Źvik Kryhier.
Zaraz u Centry čaćviortaj industryjalnaj revalucyi pracujuć bolš za 30 supracoŭnikaŭ. Kamandy zajmajucca prajektami ŭ dzieviaci halinach technałohii: štučny intelekt, internet rečaŭ, błokčejn, bieśpiłotnyja aŭtamabili, drony, prycelnaja miedycyna, mižnarodny elektronny handal i abarona navakolnaha asiarodździa. Kryhier naniaŭ ekśpiertaŭ z urada, biznesu i niekamiercyjnych arhanizacyj, uklučajučy Handlovuju pałatu ZŠA i meryju Ńju-Jorka.
Centr padpisaŭ kantrakt z 38 kampanijami i čatyrma krainami — Ruandaj, Japonijaj, Bachrejnam i Danijaj. Urady adpraŭlajuć u San-Francyska supracoŭnikaŭ na stažyroŭki praciahłaściu ad 12 da 18 miesiacaŭ, dzie tyja pracujuć z ekśpiertami dla raspracoŭki dziaržaŭnaha palityčnaha kursu, jaki zatym budzie testavać ich kraina.
Na dumku Kryhiera, razmovy na Forumie stvarajuć materyjał dla zakanatvorčaści ŭ nacyjanalnych, rehijanalnych abo łakalnych uradach. «My nie kansałtynhavaja firma, da jakoj dziaržava prychodzić i kaža: «Možacie napisać nam zakon dla bieśpiłotnych aŭtamabilaŭ ci dronaŭ?» My stvarajem karkasy, jakija ŭrady mohuć paśla vykarystoŭvać dla stvareńnia ŭłasnych pravavych normaŭ».
Supracoŭnictva z uradami
Mnohija krainy z entuzijazmam staviacca da pracesu. «Jak tolki my farmalna adkryli Centr ŭ sakaviku 2017 hoda, nas zakidali prośbami ad uradaŭ.
Amal kožny dzień da nas pryjazdžali delehacyi, kiraŭniki ŭradaŭ, prezidenty, premjer-ministry. I ŭsie jany vielmi chacieli supracoŭničać z nami», — kaža Kryhier.
Meta — nie tolki supracoŭničać z najvialikšymi rozumami ŭ halinie technałohij, ale i pracavać, jak jany. Majecca na ŭvazie volnaje, niefarmalnaje asiarodździe, amal bieź ijerarchii, ale z mnostvam idej, što łunajuć vakoł. Tak vyhladaŭ pieršy vialiki mazhavy šturm Centra, u jakim brali ŭdzieł dziasiatki pradstaŭnikoŭ biznesu i novyja supracoŭniki, kab skłaści karotki śpis prajektaŭ, nad jakimi buduć pracavać u kožnaj z abłaściej technałohii.
Na mazhavym šturmie zasnavalnik błokčejn-startapa StoreCoin Krys MakKoj pradkazaŭ, što błokčejn stanie miechanizmam, jakim bieśpiłotnyja hruzaviki i drony buduć karystacca dla kiravańnia ruchami. Robat, jaki pieranosić terminovuju pasyłku, moža prapanavać inšamu robatu-dastaŭščyku nievialiki płaciož u abmien na propusk napierad. A hetaja tranzakcyja moža być zapisanaja ŭ błokčejnie.
Centr čaćviortaj industryjalnaj revalucyi zaachvočvaje takija razvažańni pra budučyniu.
Kryhier kaža, što heta mocna adroźnivajecca ad pracy ŭradaŭ zaraz: zamiest prahnazavańnia jany reahujuć na fakt, jaki adbyŭsia. Rola ŭrada i biznesu maje zaklučacca ŭ tym, kab «prakładvać trajektoryju dla technałohij».
Kamientary