Učora ŭ Maskvie adbyłasia sustreča kiraŭnikoŭ uradaŭ Rasiei dy Ŭkrainy.
Baki abmierkavali pytańni pastavak hazu. Pa vynikach sustrečy byŭ padpisany miždziaržaŭny memarandum.
Z čym Cimašenka pajechała da Pucina?
Kabinet ministraŭ Ukrainy zaćvierdziŭ šerah dyrektyvaŭ, u jakich značylisia niekalki pazicyjaŭ, adstupać ad katorych u časie pieramovaŭ z Uładzimieram Pucinym Julija Cimašenka nie mahła ni ŭ jakim razie.
Najpierš Rasieja pavinnaja była dakładna harantavać balans hazu dla Ŭkrainy. Akramia taho, rasiejski bok musiŭ zabiaśpiečyć technalahičnym hazam ukrainskija kampresarnyja stancyi z tym, kab jany mahli narmalna pracavać. Heta budzie harantyjaj nadziejnaha tranzytu rasiejskaha błakitnaha paliva ŭ Eŭropu praz terytoryju Ŭkrainy. I, narešcie, vychad da naŭprostavych damovaŭ na pastaŭki hazu pamiž «Hazpromam» i «Naftahazam Ukrainy».
Adnak samym składanym pytańniem musiła stać vyśviatleńnie cany na haz. Prajekt dziaržbiudžetu Ŭkrainy praduhledžvaje jaje pamier na ŭzroŭni $260 za tysiaču kubametraŭ. Jość i alternatyŭnaje mierkavańnie — zvažajučy na zajavy rasiejskaha boku i mocny palityčny składnik, cana moža skłaści $270‑340, a to j da $400 za tysiaču kubametraŭ.
Z čym Cimašenka viarnułasia ŭ Kijeŭ?
Pa vynikach sustrečy z rasiejskim premjeram u čaćvier byŭ padpisany miždziaržaŭny memarandum, jaki praduhledžvaje paetapny trochhadovy pierachod da rynačnych cenaŭ pastavak rasiejskaha hazu va Ŭkrainu.
Memarandum deklaruje taksama ŭstalavańnie ź 1 studzienia 2009 hodu naŭprostavych doŭhaterminovych adnosinaŭ pamiž «Hazpromam» i «Naftahazam Ukrainy» pa pastaŭkach hazu va Ŭkrainu ŭ abjomach, dastatkovych dla zabieśpiačeńnia balansu hazu dla ŭkrainskich spažyŭcoŭ. Ukraina ŭziała na siabie abaviazak zabiaśpiečyć bieśpierapynny tranzyt hazu praz svaju terytoryju.
SP, pavodle korrespondent.net, Dieło
