Uładź Čačotkin.
My źviazalisia z chłopcam, kab raspytać, što dla jaho značyć BNR i jak na žest adnym macham patracić 1000 jeŭra adrehavali znajomyja i svajaki.
Samy ščodry sponsar pahadziŭsia raspavieści «Našaj Nivie» 10 faktaŭ pra siabie.
1. Uładzisłaŭ naradziŭsia u Minsku. Skončyŭ himnaziju №33. Jaho baćki taksama staličnyja, a voś babuli i dziaduli pryjechali z rehijonaŭ. Maci pracuje majstram pa manikiury i piedykiury, baćka — taksist. Uładzisłaŭ viadzie samastojnaje žyćcio: žyvie asobna ad baćkoŭ.
2. U siamji jon nie adziny syn. Maje starejšuju na 10 hod siastru.
3. Da prahramavańnia chłopiec adčuŭ schilnaść jašče ŭ škole, pastupiŭ i skončyŭ tahačasny Minski dziaržaŭny vyšejšy radyjotechničny kaledž. Ciapier pracuje raspracoŭščykam prahramnaha zabieśpiačeńnia ŭ aŭtsors-kampanii.
4. Ciaham dvuch hod u junactvie chadziŭ z dredami, ale častkaj niejkaj subkultury ci niefarmalnaha ruchu nikoli nie byŭ. Cikavicca papularnaj navukaj i historyjaj. Zachaplajecca tvorčaściu Jahora Letava.
5. U asiarodździ chłopca nichto nie razmaŭlaje pa-biełarusku, ale jon sam sprabuje. «Ja nie vielmi dobra vałodaju biełaruskaj movaj, z hetym źviazanyja niekatoryja psichałahičnyja kompleksy, ale ja zmahajusia z hetym. Piśmovaja biełaruskaja mova, kali jość mahčymaść padhladać u słoŭnik, pakul dajecca mnie praściej», — raskazvaje chłopiec.
6. Da taho, kab adčuć suviaź z BNR, Uładzisłaŭ išoŭ dosyć praciahły čas: «U vyniku ja vyznačyŭsia, što ja — hramadzianin svajoj krainy (nie błytać ź dziaržavaj) i budu rabić dla jaje toje, što mahu. U mianie byli niekatoryja zapasy hrošaj i ja achviaravaŭ ich na śviatkavańnie stahodździa BNR. Usio ž 100 hod zdarajecca raz u žyćci, jak kazaŭ Pavieł Biełavus».
7. Na toje, što Uładź pieraličyŭ niemałyja hrošy na takuju spravu, znajomyja adreahavali supraćlehłym čynam. Niekatoryja pisali, što jon «duranuŭsia» i «navokał jość bolš važnyja prablemy». Inšyja padtrymali, pisali «reśpiekt!».
8. Uładź spadziajecca, što 25 sakavika śviata sapraŭdy projdzie ŭ farmacie hihanckaha mitynhu-kancerta kala Vialikaha teatra opiery i baleta — asabista dla jaho heta idealny scenaryj.
9. Chłopiec pryznajecca, što niejki čas u jaho byli dumki pra toje, kab źjazdžać z krainy, ale siońnia jon usio bolš upeŭnivajecca ŭ tym, što moža zabiaśpiečyć sabie kamfortnaje žyćcio i samarealizavacca na radzimie.
10. Na pytańnie, ci zaniataje jaho serca, Uładzisłaŭ adkazvaje žartaŭliva: «Tak, Biełaruśsiu. I spadziajusia, što heta ŭzajemna».
