«Pierśpiektyva vyžyvańnia polskaj mienšaści ŭ Biełarusi?» — takuju temu prapanavaŭ dla abmierkavańnia ksiondz-prafiesar Raman Dzvankoŭski padčas sustrečy 22 lutaha ŭ Breście ŭ pamiaškańni polskaj škoły imia Ihnata Damiejki.
Na sustrečy prysutničali pradstaŭniki bresckich katalickich parafij, nastaŭniki polskaj movy, kiraŭniki polskich arhanizacyj, polski konsuł u Breście Ježy Hrymanoŭski.
U svajoj pramovie śviatar najbolšuju ŭvahu źviarnuŭ na stvareńnie nacyjanalnaha Biełaruskaha Kaścioła, zamiest, pavodle jaho, nadnacyjanalnaha Kaścioła ŭ Biełarusi. Adnoj z pryčyn biełarusizacyi i rusifikacyi jon nazvaŭ pracu ŭ Biełarusi 1990-ch hadach polskich śviataroŭ, jakija nie hatovyja byli padtrymlivać polskaść u Biełarusi.
Jak paviedamlaje Echo Polesia, padčas sustrečy byŭ dasiahnuty kansensus nakont ahulnaj słabaści polskaha ruchu ŭ abaronu polskaj movy ŭ Kaściole, i choć nichto nie stavić pad sumnieŭ prava biełarusaŭ na udzieł u Imšy pa-biełarusku, było zajaŭlena, što maštaby ŭviadzieńnia biełaruskaj movy ŭ žyćcio Kaścioła i liturhiju niepraparcyjna vialikija ŭ paraŭnańni z pracentam viernikaŭ biełaruskaj nacyjanalnaści. Taksama zajaŭlałasia, što heta asłablaje aŭtarytet Katalickaj Carkvy ŭ vačach viernikaŭ-palakaŭ, jakija nibyta składajuć bolšaść u katalickich parafijach.
