Para ź Italii 12 hadoŭ prymała na azdaraŭleńnie biełaruskuju dziaŭčynku z rajonaŭ, paciarpiełych ad avaryi na ČAES. Uvieś hety čas dziaŭčynka padviarhałasia žorstkamu abychodžańniu i była zhvałtavanaja, paviedamlaje italjanskaja presa.
Ciapier biełaruscy 22 hady. U 2014 hodzie jana trapiła ŭ surjoznaje DTZ, kali jechała na rovary, i atrymała invalidnaść. Strachavaja kampanija vypłaciła joj 2 młn 212 tysiač jeŭra, piša Ilmessaggero.it. Adnak biełaruska pra vypłatu ničoha nie viedała, hetyja hrošy byli prysvojenyja italjanskaj paraj.
Častku hetych hrošaj jany patracili na nabyćcio dźviuch vił, mašyn i «inšych aktyvaŭ», jakija ciapier kanfiskavanyja.
Jak piša Blitzquotidiano.it, historyja stała viadomaja dziakujučy zapiscy z prośbaj ab dapamozie, jakuju ŭ kastryčniku minułaha hoda dziaŭčyna pakinuła sacyjalnamu rabotniku.
Niezadoŭha da taho biełaruska raspaviała «pryjomnaj maci», što była zhvałtavanaja sužycielem italjanki, kali była jašče niepaŭnaletniaj. Paśla hetaha jaje vysielili z domu ŭ adnapakajovuju kvateru, jakaja, jak piša italjanskaja presa, była nieprydatnaja dla žyćcia z-za jaje fizičnaha stanu.
Zaraz 71-hadovy mužčyna i 59-hadovaja žančyna aryštavanyja palicyjaj. Ich abvinavačvajuć u złačynstvach, źviazanych z žorstkim abychodžańniem, machlarstvam i seksualnym hvałtam.
«Biełaruska była ŭziataja pad achovu i atrymała vid na žycharstva pa mierkavańniach spraviadlivaści», — paviedamlajuć ŚMI.
