Prapanova pra padaražeńnie šenhienskaj vizy da 80 jeŭra jašče budzie abmiarkoŭvacca ŭ Jeŭrapiejskim parłamiencie i Radzie ES i nie začepić Biełarusi, kali naša kraina damovicca ab źnižeńni vizavaha zboru da 35 jeŭra, paviedamlaje BiełTA sa spasyłkaj na pradstaŭnictva ES u Biełarusi.
Napiaredadni Jeŭrakamisija abviaściła ab raspracoŭcy papravak u vizavyja praviły ES i prapanavała pavialičyć pamier konsulskaha zboru za šenhienskija vizy — z 60 da 80.
Prapanavanyja źmieny jašče buduć abmiarkoŭvacca ŭ Jeŭrapiejskim parłamiencie i Radzie ES. Pierad tym jak novyja praviły stanuć zakonam, ź imi pavinny pahadzicca abodva instytuty.
Pry hetym u pradstaŭnictvie adznačyli, što pavieličeńnie vizavaha zboru nie zakranie tyja krainy, hramadzianie jakich płaciać bolš nizki zbor — 35 jeŭra. Hetyja krainy (Rasija, Armienija, Azierbajdžan) padpisali ź ES pahadnieńnie ab spraščeńni vizavaha režymu.
Biełaruś užo niekalki hadoŭ viadzie kansultacyi i pieramovy ź ES ab spraščeńni vizavych farmalnaściej. Jašče ŭ minułym hodzie paviedamlałasia ab tym, što pieramovy znachodziacca na zaviaršalnym etapie.
Kab košt na vizy byŭ źnižany, Minsk i Brusiel pavinny zaklučyć dva pahadnieńni — ab spraščeńni vizavych pracedur i ab readmisii. Ni adzin z dakumientaŭ pakul nie padpisany, i dakładnych terminaŭ nie ahučana.
Čakajecca, što nastupny raŭnd pieramoŭ adbudziecca ŭ Minsku ŭ bližejšyja miesiacy.
