Alaksandr Łukašenka siońnia razam z prezidentam Hruzii Hiorhijem Marhviełašvili pa zaviaršeńni aficyjnych pieramoŭ naviedali Tbiliski kańjačny zavod, pieradaje BiełTA.
Fota: BiełTA.
Kiraŭniku biełaruskaj dziaržavy padrabiazna raspaviali pra historyju pradpryjemstva, a taksama ab roznych tonkaściach technałohii vytvorčaści kańjaku i jaho pravilnaha ŭžyvańnia. Pa słovach kiraŭnictva zavoda, na pradpryjemstvie zachoŭvajecca adzin z najstarejšych kańjačnych śpirtoŭ 1893 hoda, jaki tam ličać nacyjanalnym zdabytkam, adnak vysokim haściam dajuć jaho pradehustavać.
Skarystaŭsia pradstaŭlenaj mahčymaściu i Alaksandr Łukašenka. Razam z Hiorhijem Marhviełašvili jany acanili smakavyja jakaści vytrymanaha napoju. Alaksandr Łukašenka pry hetym skazaŭ tost za vialiki i mudry hruzinski narod i jaho synoŭ. U svaju čarhu prezident Hruzii pramoviŭ tost za biełaruski narod.
