U Ńju-Branśviku, u hateli Hyatt, adznačyli 100 hadoŭ abviaščeńnia niezaležnaści Biełarusi. Prajšoŭ śviatočny abied, uračystaść, vystava mastackich vyrabaŭ i knižnaj pradukcyi. Dniem raniej Dień Voli adznačali ŭ Ńju-Jorku.
Była začytanaja praklamacyja ad hubiernatara Ńju Džersi Filipa Merfi, vinšavańnie ad kanhresmena Śmita. Kanhresmen Pałłone mieŭ honar asabista pavinšavać usich prysutnych. Taksama byli začytanyja vinšavańni ad staršyni Rady BNR sp. Ivonki Surviłły, a taksama siabroŭskich arhanizacyjaŭ: Adździełaŭ BAZA ŭ Vašynhtonie i Paŭdniovaj Fłarydzie, Zhurtavańnia Biełarusaŭ Kanady, Zhurtavańnia biełarusaŭ śvietu «Baćkaŭščyna», Nacyjanalnaha Hramadskaha Arhanizacyjnaha Kamitetu pa śviatkavańni 100-hadovaha jubileju BNR.
Arhanizatary mierapryjemstva taksama pryvitali haściej: sa śviatočnymi pramovami vystupili staršynia Adziełu BAZA ŭ Ńju Džersi, sp. Jurka Azarka, staršynia BAZ «Pahonia» Vital Zajka i staršynia Hałoŭnaj upravy BAZA, Natalla Fiedarenka.
Ź vinšavalnymi pramovami vystupili hanarovyja hości: pieršy ambasadar ZŠA ŭ Biełarusi sp. Devid Suorc i sp. Džon Kunstadtar - były namieśnik ambasadara ZŠA ŭ Biełarusi.
Z asnoŭnym refieratam, pryśviečanym padziejam u Biełarusi 25 Sakavika 1918 hodu, značeńniu abvieščańnia BNR dziela nabyćcia niezaležnaści Biełarusi, vystupiŭ sp. Zianon Paźniak. Aprykancy svajoj pramovy sp. Paźniak źviarnuŭ uvahu prysutnych na falšyvy pavodziny biełaruskich uładaŭ padčas śviatkavańnia 100-hadovaha jubileju BNR, jakija dazvoliŭšy pravieści mitynh-kancert, hramadskija i mastackija vystupy dziela častki pradstaŭnikoŭ hramadzianskaj supolnaści, aryštavali ŭdzielnikaŭ inšych mirnych śviatočnych mierapryjemstvaŭ, pryśviečanych jubileju.Va ŭračystaj imprezie ŭziali udzieł hanarovyja hości ź Biełarusi: sp. Jury Bieleńki, vykonvajučy abaviazki staršyni KCHP-BNF na Biełarusi; hramadski dziejač ź Lidy sp. Valery Miniec; i mastak Ivan Mikułka, jaki padaryŭ amierykanskim biełarusam ad biełarusaŭ Baćkaŭščyny hierb «Pahonia», vyrazany z dubu.
Naprykancy śviatočnaj akademii byli pryniatyja dźvie rezalucyi. Pieršaj rezalucyjaj udzielniki śviatkavańnia 100-ych uhodkaŭ u Ńju Branśviku vykazvajuć šanavańnie pamiaci biełaruskich nacyjanalnych dziejačoŭ usich časoŭ; vitajuć usich surodzičaŭ, jakija padtrymlivajuć ideały Aktu 25 Sakavika; patrabajuć ad uładaŭ Biełarusi spynić zabaronu i ŭcisk nacyjanalnych symbalaŭ Biełarusi;asudžajuć antynacyjanalny dyktatarski režym u Biełarusi; zaklikajuć urad ZŠA praciahvać dapamohu nacyjanalnym demakratyčnym siłam u Biełarusi i zaprašajuć usich biełarusaŭ i vychadcaŭ ź Biełarusi ŭ ZŠA dapamahčy svajoj Baćkaŭščynie adnavić demakratyju i sapraŭdnuju niezaležnaść praz dapamohu demakratyčnym siłam Biełarusi.
Druhoj rezalucyjaj prysutnyja vykazvajuć asudžeńnie dziejańniaŭ represiŭnych strukturaŭ režymu Biełarusi, jakija, dazvoliŭšy pravieści mitynh-kancert, hramadskija i mastackija vystupy dziela častki pradstaŭnikoŭ hramadzianskaj supolnaści, aryštavali ŭdzielnikaŭ inšych mirnych śviatočnych mierapryjemstvaŭ, pryśviečanych 100-hadovamu jubileju BNR; ličać, što takoje rašeńnie ŭładaŭ nia jość prychilnym dla ludziej krokam, a pavodziny jość falšyvymi; patrabujuć vyzvaleńnia aryštavanych.
Zianon Paźniak
Źleva — patryjarch biełaruskaj emihracyi Vitaŭt Kipiel.
Dziejačy emihracyi Vital Zajka i Siaržuk Sokałaŭ-Vojuš
