Paśla šmathadovaha pierapynku ŭ baraćbie ź niepažadanymi dumkami ŭłada vyrašyła paŭtaryć «pośpiech» biełaruskaha TB pierad rasijskimi telekanałami, «vyzvalajučy» biełaruski internet ad biełarusaŭ, jakija z takoj ciažkaściu utrymlivajucca ŭ im, na karyść zamiežnych sajtaŭ.
Padobna na toje, što paśla źmieny top-kamandy ŭ Mininfarmie nie zastałosia ludziej, jakija karystajucca internetam. A hazietčyki nie razumiejuć, što źmiena krynicy infarmacyi abo miesca dla abmierkavańnia navin ź biełaruskaha na zamiežnaje ažyćciaŭlajecca karystalnikam u adzin klik biez usiakaha dazvołu dziaržavy i całkam biaspłatna.
Papraŭki z punktu hledžańnia ŭzmacnieńnia žorstkaści mieli b sens, kali b jany supravadžalisia filtravańniem zamiežnych navinavych sajtaŭ i sacyjalnych sietak. Chaču bačyć, jak Mininfarm zafiltruje Lentu.Ru abo Miejł.Ru, UKantakcie ci Fejsbuk, dy choć by biełaruski «Sputnik», jak adreahujuć Zachad i Rasija i jak paśla hetaha budzie prasoŭvacca ekspart biełaruskaj pradukcyi (samazvałaŭ, «małočki», asabliva chajteka). My pa značnaści ŭ śviecie daloka nie Kitaj, nam «kitajskaha» zakanadaŭstva nie darujuć. A kali nie ŭžyvać papraŭki na spravie, navošta jany?..
Kali ŭłada vyrašyła ŭ čarhovy raz napałochać našy ŚMI — tak jany i tak pužanyja: pa dziejsnym zakanadaŭstvie možna začynić luby sajt za piać chvilin. Kudy jašče bolš žorstka?.. A voś luboje ŭzmacnieńnie žorstkaści praktyki pracy žurnalistaŭ nakštałt adsutnaści akredytacyi dla niepažadanych miedyja pryviadzie da abmiežavańnia ich mahčymaści aśviatlać padziei i naohuł rabić svaju pracu jakasna. Nu a patrabavańnie identyfikacyi karystalnikaŭ pryviadzie da ich zychodu na zamiežnyja sajty, dzie niama abmiežavańniaŭ. A moža — chto viedaje — naša ŭłada sapraŭdy zadumała pieradać biełaruskuju internet-prastoru Rasii i ZŠA?
