Sierž Sarhsian padaŭ u adstaŭku z pasady premjer-ministra Armienii, paviedamlaje news.am.
U zajavie Sarhsian ukazaŭ, što apošni raz źviartajecca da hramadzian jak kiraŭnik dziaržavy. «Nikoł Pašynian [lidar apazicyi] mieŭ racyju. Ja nie mieŭ racyi. U situacyi, jakaja skłałasia, jość niekalki rašeńniaŭ, ale ni na adno ź ich ja nie pajdu. Heta nie majo. Ja pakidaju pasadu kiraŭnika našaj krainy», — cytuje pres-słužba słovy Sarhsiana.
«Vulica suprać majho pryznačeńnia. I ja vykonvaju vaša patrabavańnie», — paviedamiŭ jon.
Akcyi pratestu suprać pryznačeńnia byłoha prezidenta Sierža Sarhsiana premjeram krainy prachodzili z 13 krasavika.
Sarhsian byŭ prezidentam Armienii z 2008 hoda, ale ŭ vyniku źmienaŭ kanstytucyi kraina pieratvarałasia ŭ parłamienckuju krainu, dzie hałoŭnaj asobaj u krainie stanaviŭsia premjer. Na hetu pasadu byŭ abrany Sarhsian, i ŭ krainie vybuchnuli pratesty. Uznačaliŭ pratesty Nikoł Pašynian.
Pašynian byŭ zatrymany ranicaj u niadzielu, nieŭzabavie paśla taho jak sustreŭsia z premjeram Sarhsianam u haścinicy «Maryjot». Im nie ŭdałosia damovicca, Sarhsian zajaviŭ, što apazicyja zajmajecca «šantažom dziaržavy i zakonnych uładaŭ», i prapanavaŭ «viarnucca ŭ zakonnaje pole». Ale siońnia Pašynian byŭ vyzvaleny, a da pratestoŭcaŭ dałučylisia vajskoŭcy adnoj z častak.
