Ad ranku ŭ internecie byŭ zapuščany rekłamny rolik, jaki zaklikaŭ prychodzić uletku na «Chmialnoŭ-fest». Heta biaspłatny muzyčny festyval, jaki arhanizoŭvaje brend piva «Chmialnoŭ». Sioleta jon maje adbycca na placoŭcy la stadyjona «Traktar».
Uvahu błohieraŭ źviarnuŭ śpis udzielnikaŭ fiestyvala: «Lube», «Krambambula» i «Drazdy». «Chedłajniery, jakich my zasłužyli», — žartavali ŭ internecie.
«Lube» — heta papularny rasijski hurt, jaki śpiavaŭ pra vajnu ŭ Čačni, a taksama pra vielič Rasii. Lidar hurta Mikałaj Rastarhujeŭ nazyvaŭ ukraincaŭ «złobnymi i zambavanymi», abvinavačvaŭ u zmovie suprać Rasii.
My spytalisia ŭ Lavona Volskaha, ci sapraŭdy jon płanuje vystupać razam z «Lube»? «My navat pieśniu pra «Kambata» možam razam», — spačatku šakuje Lavon Volski.
«Nu što vy havorycie, jaki kancert razam z «Lube»? Nu chiba heta mahčyma? Jak źjaviłasia rekłama, hetak i źniknie. Išli razmovy, što my možam vystupić na «Chmialnovie», ale pra «Lube» daviedalisia tolki siońnia. Heta niemahčyma, kab my razam vystupali», — skazaŭ «NN» Lavon Volski.
Muzyka mieŭ racyju, praź niejki čas afiški, dzie razam byli «Lube» i «Krambambula», sapraŭdy źnikli ź interneta.
«Chmialnoŭ» — heta ŭłasnaja handlovaja marka «Jeŭraopta». Pres-sakratar «Jeŭraopta» Jahor Chrustaloŭ patłumačyŭ «Našaj Nivie», što arhanizacyjaj festu zajmałasia adno z rekłamnych ahienctvaŭ, jakoje prajaviła zališniuju ŭłasnuju inicyjatyvu. U kiraŭnictvie «Chmialnova» pra heta nie viedali. Uvohule ŭ kampanii chacieli pravieści internet-hałasavanku, kaho hledačy chočuć bačyć na feście.
«Možam dakładna skazać, što nijakaj damovy pa chedłajnierach festyvala pakul niama. Heta była inicyjatyva rekłamnaha ahienctva», — skazaŭ Chrustaloŭ.
Chto ž urešcie vystupić na «Chmialnoŭ-feście», pakul niezrazumieła. Ale padobna, što ad «Krambambuli» nichto admaŭlacca nie choča.
