Hacyjanalny pravavy internet-partał Biełarusi apublikavaŭ prajekt źmienaŭ u Kryminalny kodeks. Dakumient padrychtavany Savietam ministraŭ i ŭniesieny na razhlad u parłamient. Peŭnyja jaho normy jašče mohuć być skarektavanyja.
«Naša Niva» adabrała piać hałoŭnych źmienaŭ u zakanadaŭstva, praduhledžanych prajektam.
«Dziejnaść ad imia niezarehistravanaj arhanizacyi»
…budzie narešcie dekryminalizavanaja. Absurdnaja norma, pa jakoj mnohija maładafrontaŭcy atrymali realnyja terminy, budzie pieraviedziena z kryminalnaha kodeksa ŭ administratyŭny.
Heta była adna z nastojlivych prośbaŭ Jeŭrasajuza.
Maksimalnaje pakarańnie budzie składać 50 bazavych vieličyniaŭ, ale kali pryznaješ vinu — usiaho 0,5 bazavaj.
Źmiakčeńnie narkatyčnych artykułaŭ
Jak i anansavałasia, adkaznaść za raspaŭsiud narkotykaŭ moža być źmienšanaja, ale nie nadta mocna. Raniej za heta sadžali ad 5 da 8 hadoŭ, buduć — ad 3 da 8 hadoŭ. Za dziejnaść u składzie hrupy było ad 8 da 15 hadoŭ, budzie — ad 6 da 15 hadoŭ. Kali raniej praduhledžvałasia mahčymaść kanfiskacyi majomaści, to ciapier buduć abmiažoŭvacca bujnymi štrafami.
Zdrada dziaržavie
Raniej luboha zdradnika mahli pasadzić na 7-15 hadoŭ. Ciapier vajskoŭcy i słužboŭcy vyniesieny ŭ asobnuju katehoryi. Ich u vypadku zdrady čakaje 10-20 hadoŭ źniavoleńnia.
Daviadzieńnie da samahubstva
Raniej pad hetu traktoŭku traplała žorstkaje abychodžańnie albo sistematyčnaje prynižeńnie honaru. Ciapier prapanujecca značna pašyryć farmuloŭku. Pad daviadzieńniem da samahubstva buduć razumieć pahrozy hvałtu da achviary ci jaho blizkich, paklop albo razhałošvańnie sakretnych źviestak, kali jany pryviali da trahiedyi.
Aproč taho, dadajecca novy artykuł «Prapahanda samahubstva», vyklikany patrebami času. Stvaralniki adpaviednych supołak u sacsietkach zmohuć być pakaranymi abmiežavańniem svabody na termin da dvuch hadoŭ. Kali ž da ich «paradaŭ» niechta prysłuchaŭsia, to moža śviacić realny turemny termin da 5-6 hadoŭ.
Śledčyja dziejańni biez paniatych
Praduhledžvajecca mahčymaść pravodzić śledčyja dziejańni biez ŭdziełu paniatych. Ale abaviazkovaja ŭmova — niaspynnaje viadzieńnie aŭdyja- i videazapisu.
* * *
Kožnamu achvotnamu prapanujecca pakidać svaje prapanovy pa ŭdaskanaleńni źmienaŭ u Kryminalny kodeks.
Kamientary