Kaciaryna Turok. Trenirujecca dziaŭčyna na stadyjonie škoły «Zołak».
U adkaz na pytańnie, ci moža jana ŭ svajoj mašynie zamianić, naprykład, koła, śmiajecca: «Ja mator mahu pierabrać!»
Kaciaryna ŭpeŭnienaja: kali zajmacca luboj spravaj, treba heta rabić z razumieńniem, z adkaznaściu.
«Kožny honščyk pavinien viedać, što adbyvajecca ź jaho mašynaj. Kali raptam niešta padčas zajezdu zahrukała, treba aceńvać, ci zmožaš ty skončyć honku, abo lepiej spynicca».
Aŭtasport pryjšoŭ u žyćcio 15-hadovaj Kaci vypadkova. Adnojčy baćka pavioŭ dačku na kartynh. Dačce dalnabojščyka tak spadabałasia za rulom, što jana zapatrabavała ŭ baćkoŭ: «Chaču jeździć!»
«Pieršuju svaju honku pamiataju dobra. Syn majho treniera nie zmoh paŭdzielničać u honcy. Daŭ mnie svaju mašynu. Skazaŭ: «Voś try piedali, voś styrno, voś karobka. Raźbiarešsia pa chodu».
Honku tuju ja, viadoma, nie zakončyła. Koła trapiła ŭ jamu. Ale adrenalinu chapiła nadoŭha». Siońnia Kacia jeździć na VAZ 2108.
Kaciaryna z baćkam. Jon dapamahaje i padtrymlivaje dziaŭčynu va ŭsim.
«Hetaja mašyna ličycca tannaj i pry hetym z mocnym kuzavam. My z tatam nabyli staroje aŭto, vykinuli adtul hramadzianskija detali. Ustavili detali honačnyja».
Mašyna kaštavała $5000, epikipiroŭka — šlem, kambiniezon, abutak — jašče $1000.
Kaciaryna — adzinaja dziaŭčyna ŭ kamandzie aŭtahonščykaŭ.
«Spačatku mianie nie ŭsprymali jak supiernicu. Nu chodzić niejkaja dziaŭčynka, chaj chodzić. Ale pabačyli, jak ja siabie pavodžu na trasie, što vyjhraju zajezdy, pavaha źjaviłasia. Pryjemna, kali navat starejšyja za ciabie chłopcy z taboj ličacca, razmaŭlajuć, jak z roŭnaj».
Tut mašyny rychtujuć da honak.
Aŭtahonki — sport niebiaśpiečny
«U sałonie staić akumulatar, tamu my jeździm adny, biez šturmanaŭ. Da taho ž, na treniroŭkach nas vučać u mašynie pieravaročvacca. Sa mnoj heta zdarałasia dvojčy».
Kaciaryna raskazvaje, što honščyk vielmi ščylna zamacoŭvajecca ŭ kreśle, tamu bolš za ŭsio strašna atrymać traŭmu šyi.
«Dy i toje ciapier jeść chamuty, jakija fiksujuć šyju. I jana nie boŭtajecca».
Nasupierak tamu, što sport traŭmatyčny, baćki Kaci całkam na jaje baku.
«Baćka Alaksandr dapamahaje jak miechanik. Maci i brat taksama padtrymlivajuć. Chacia brat da hetaha kpić ź mianie, paśla taho, jak na hramadzianskaj mašynie ja zahłochła na skryžavańni».
Čaho nie daruje aŭtasport, dyk heta kapryzaŭ, psichaŭ, kryŭd
«Padčas honki treba trymać siabie ŭ rukach. Zastavacca vytrymanaj. Paśla honki — vyzvalajsia ad emocyj, jak chočaš.
Praŭda, dla mianie aŭtasport — heta tolki pazityŭnyja emocyi. Nikoli nie złujusia ni na siabie, kali niešta nie atrymlivajecca, ni na mašynu, ni na sapiernikaŭ».
Kaciaryna vučycca na trecim kursie Mahiloŭskaha teatralnaha kaledža. Jana — budučaja aktrysa dramatyčnaha teatra i kino.
«Mnie cikava bracca za lubyja roli. Sprabavać siabie ŭ roznych ampłua. Moj trenier — kaskadzior, i ja dumała pra toje, kab taksama ŭ kino być kaskadziorkaj. Ale ŭ ideale było b samoj być u kadry i vykonvać truki».
Svajaki Kaciu nazyvajuć Šumachieram. A sama Kacia na honki «Formuły-1» hladzić z prafiesijnaha punktu hledžańnia.
«Mnie cikava, jak piłoty vybudoŭvajuć trajektoryju, jak vystaŭlajuć mašynu. I jašče pierad samym pačatkam honki, kali bujnym płanam pakazvajuć tvary honščykaŭ, vielmi cikava bačyć, pra što jany dumajuć, uhadvać pa ich emocyjach i nastroi, ci vyjhrajuć jany siońniašni zajezd. Paviercie, heta vidać zaŭsiody».
Tak atrymałasia, što Kacia jeździć za styrnom z 15 hadoŭ, a pravy kiroŭcy atrymała tolki ciapier.
«U honkach jany nie patrebnyja. I ŭmieńnie kiravać honačnaj mašynaj mnie chutčej pieraškadžała, kali ja zdavała na pravy. U DAI zdała ź piataha razu: rezkaja jazda dobraja na honkach, a ŭ horadzie treba ruchacca płaŭna, być flehmatykam».
Mašynu viartajuć u haraž.
Što dapamahaje Kaci padčas trenirovak i honak? Hurt «Akijan Elzy».
«Ich pieśni zaŭsiody hrajuć u mašynie. Jany pasłuchać i dla taho, kab słuchać adzin na adzin, i tady, kali my z tatam jedziem u jaho rejs, hutarym pra ŭsio na śviecie ŭsiu noč».
Kacia vieryć, što samyja jaje hałoŭnyja starty i pieramohi napieradzie.
«Čamu? A prosta nie bajusia pamylacca».
