Pra heta paviedamiła ŭ svaim fejsbuku aficyjnaja pradstaŭnica Śledčaha kamiteta Julija Hančarova.
Nahadajem, što Siarhieja Čałaha źbili piaciora nieviadomych u noč na 19 maja kala HUMa, u centry Minska.
Usio zdaryłasia paśla poŭnačy. Siarhiej Čały razam z dvuma siabrami piŭ piva ŭ arcy. Da ich padbiehli piać čałaviek i pačali źbivać.
«Tavaryšaŭ amal nie zakranuła, bili mianie. I tolki pa hałavie — na ciele navat siniakoŭ niama, — raspaviadaŭ Siarhiej Čały. — Usio vyhladała davoli dziŭna. Jany nie toje, što mima prachodzili, maŭlaŭ, «daj zakuryć». I nie było pretenzij da ŭsioj kampanii. Tady b adnolkava dastałasia ŭsim».
Siarhieja Čałaha dastavili ŭ špital z čerapna-mazhavoj traŭmaj i pierałomam nosa.
U svaju čarhu, sajt HUUS Minska piša pra čatyroch zatrymanych. Milicyja źviartaje ŭvahu, što «Siarhiej Čały raskazaŭ, što viečaram u kafe raśpivaŭ śpirtnyja napoi sumiesna sa svaimi znajomymi. U 23.00 hadzin, paśla zakryćcia kafe, žurnalist sumiesna z dvuma tavaryšami nabyli piva i šaurmu i nakiravalisia ŭ dvor doma №8 pa vulicy Lenina, dzie praciahnuli raśpivać śpirtnyja napoi. Z pryčyny ałkaholnaha apjanieńnia Čały i jaho siabar pakazać kolkaść i prykmiety asob, jakija nanosili im ŭdary, a taksama kankretnyja abstaviny zdareńnia, nie zmahli».
Milicyja vyśvietliła, ŭ hetym ža dvary piła nie tolki kampanija Čałaha, ale i jašče adna kampanija ź piaci čałaviek. Kala 00.30 hadzin nazvanyja maładyja ludzi ŭžo vyrašyli razychodzicca pa damach. Prachodziačy mima kampanii Čałaha, siamiejnaja para, jakaja adstała ad svaich siabroŭ, pačuła ŭ svoj adras roznaha rodu žarty, kpiny i maty. «Pradbačačy kanflikt, muž patelefanavaŭ siabram, jakija ŭ toj čas užo adyšli napierad, — zajaŭlaje milicyja. — Kampanija Čałaha spravakavała kanflikt, u vyniku jakoha pačałasia ŭzajemnaja bojka, vynik jakoj vyrašyła kolkaść vypitaha śpirtnoha i kolkaść udzielnikaŭ», — iranizuje milicyja.
«Ničoha sabie. U mianie zusim inšyja ŭjaŭleńni, pra toje, što było…» — ździviŭsia viersii siłavikoŭ Siarhiej Čały. «Nas chočuć niejak vystavić… My prosta hutaryli ź siabrami, paśla niejki mužčyna prachodziŭ mima i štości skazaŭ nam. My ŭžo źbiralisia razychodzicca, ahresiŭna nie adkazvali. Intaresa ładzić bojku ŭ nas dakładna nie było, tym bolš adpuskać kpiny ŭ adras žančyny», — zapeŭnivaje jon.
Kamientary