Amerykanskaja hazeta The New York Times pradstaviła pieršaje padrabiaznaje apisańnie bajavoha sutyknieńnia ŭ pravincyi Dejr-ez-Zor u Syryi 7 lutaha sioleta, piša «Radyjo Svaboda».
Pa dadzienych vydańnia, pry atacy na naftapierapracoŭčy zavod zahinuła kala 300 syryjskich vajskoŭcaŭ i tych, kaho hazeta nazyvaje «rasiejskimi najmitami». Jak miarkujecca, heta byli bajcy «Pryvatnaj vajennaj kampanii (PVK) Vahniera». The New York Times adznačaje, što infarmacyju pra ataku paćviardžajuć krynicy ŭ Minabarony ZŠA.
Hazeta paviedamlaje, što boj doŭžyŭsia nia mienš za čatyry hadziny. Surazmoŭcy vydańnia padkreślivajuć, što heta byŭ samy niebiaśpiečny boj za ŭvieś čas vajennych dziejańniaŭ u Syryi, kali ŭ sutyknieńni ŭdzielničali amerykanskija i, jak miarkujecca, rasiejskija vajskoŭcy.
Pavodle infarmacyi krynic, 30 vajskoŭcaŭ ZŠA z atradu «Delta» akazvali «vajennuju padtrymku» kurdzkim i syryjskim paŭstancam u rajonie naftapierapracoŭčaha zavodu.
Prykładna ŭ 15 hadzin pa miascovym časie vojski kaalicyi vyjavili nabližeńnie da zavodu sałdat syryjskich uradavych vojskaŭ. Amerykanskija vajskoŭcy naličyli kala 500 vajskoŭcaŭ i kala 30 tankaŭ i inšych mašyn. Jak paviedamlaje The New York Times, a 22 hadzinie amerykancy ŭbačyli, što da ich pačała nabližacca kalona tankaŭ. Praz paŭhadziny pačaŭsia boj.
Vajskoŭcy ZŠA nia stali adkryvać ahoń u adkaz, śćviardžajuć krynicy hazety. Adznačajecca, što jany datelefanavalisia da rasiejskich vajskoŭcaŭ i sprabavali pierakanać ich spynić boj. Paźniej, kamentujučy sytuacyju, kiraŭnik Pentahonu Džejms Mecis zajaviŭ, što rasiejskaje kamandavańnie ŭ Syryi zajaviła tady, što vajskoŭcy z Rasiei nia majuć dačynieńnia da sałdat, jakija pačali boj. Paśla hetaha Mecis daŭ zahad adkryć ahoń z vykarystańniem avijacyi.
Pa dadzienych krynic The New York Times, zahinuli ad 200 da 300 čałaviek, jakija zmahalisia na baku prezydenta Syryi Bašara Asada. Vydańnie nie ŭdakładniaje, ci byli rasiejcy siarod zahinułych. Raniej paviedamlałasia, što, pa roznych źviestkach, straty «PVK Vahniera» u bai pad Dejr-ez-Zorom skłali ad niekalkich dziesiatkaŭ da niekalkich sotniaŭ čałaviek. Dziaržsakratar ZŠA Majkł Pampeo na słuchańniach u Senacie niadaŭna zajaviŭ pra «paru sotniaŭ zahinułych rasiejcaŭ» u hetym bai.
