«Art Siadziba», «Symbal.by» i KCHP-BNF raspačynajuć siońnia akcyju «Brukavanka pamiaci» da 30-hodździa adkryćcia Kurapataŭ. Pra heta Radyjo Svaboda raspavioŭ hramadzki aktyvist, zasnavalnik «Art Siadziby» i kramy «Symbal.by» Pavał Biełavus.
Fota Siarhieja Hudzilina
Sens akcyi ŭ tym, kab zrabić dobruju, jakasnuju darohu na ŭvachodzie ŭ memaryjał.
«Zazvyčaj viasnoj i vosieńniu jaje zalivaje vadoj z MKAD i iści davodzicca praz łužyny i hraź. Tamu tut budzie zrobleny nasyp i vykładzienaja admysłovaja brukavanka», — skazaŭ Pavał Biełavus.
Na kraŭdfandynhavaj placoŭcy «Tałaka» nieŭzabavie raspačniecca kampanija pa zbory achviaravańniaŭ na cahlinki, tamu ŭziać udzieł u stvareńni darohi zmoža kožny žadajučy.
Inicyjatary akcyi planujuć zrabić darohu ŭžo da nastupnych Dziadoŭ, kali budzie adznačacca 30-hodździe pieršaj akcyi ŭ Kurapatach. Pavodle Paŭła Biełavusa, stvareńnie darohi ŭchvaliŭ Zianon Paźniak.
«My zmahajemsia za terytoryju vakoł asnoŭnaha memaryjału, kab tut nie išło budaŭnictva i nie źjaŭlalisia novyja abjekty, heta dobra. Ale za hetym zmahańniem zabyvajemsia na toje, što adbyvajecca ŭ samim kompleksie. Heta budzie symbalična i važna, što my zrobim vartuju spravu, daŭno patrebnuju. Usie my kažam pra novyja memaryjały ŭnutry, a nie sprabujem vyrašyć voś takuju prablemu», — skazaŭ Biełavus.
Sabranyja achviaravańni buduć pieradadzienyja siabram KCHP-BNF, jakija ŭžo daŭno zajmajucca Kurapatami.
Pavodle Paŭła Biełavusa, ludzi idučy na akcyju 3-ha červienia, mohuć taksama prynieści svoj kamień, jaki symbalizuje ich ciažar i bol, i pakinuć na ŭvachodzie ŭ memaryjał.