Na sajcie Relax.by źjaviŭsia padrabiazny materyjał, pryśviečany «Pajedziem, pajadzim» — restaranu, jaki niadaŭna adkryŭsia ŭ Kurapatach.
Fota radyjo «Svaboda».
Artykuł vidavočna rekłamny, choć adpaviednaj paznaki ŭ tekście niama. U im raskazvajecca pra ekałahičny interjer i chatniuju kuchniu. Cikava, što miescaznachodžańnie restarana aŭtarka paznačaje jak «pad Minskam» ci «na 51-m kiłamietry MKAD».
Kali vy nie viedali, to «Pajedziem, pajadzim» — miesca «dla siamiejnaha adpačynku ŭ chatnim farmacie».
U artykule padrabiazna apisany interjer restarana, dyzajnierskija rašeńni i mieniu. A voś pra toje, što haściej sustrenie na ŭvachodzie hrupa pratestoŭcaŭ, nie paviedamlajecca.
Aburanyja internet-karystalniki pakinuli pad artykułam sotni niehatyŭnych kamientaroŭ, hnieŭna vykazvajucca i ŭ sacsietkach.
U redakcyi «Relax.by» pra artykuł razmaŭlać nie zachacieli. Adkaz karotki: nijakich kamientaroŭ.
A paźniej artykuł uvohule prybrali z sajta, pakinuŭšy paznaku, što jon byŭ biaspłatnym. Maŭlaŭ, zvyčajny ahlad restarana.
Krynicy «Našaj Nivy» paviedamlajuć, što rekłamnyja materyjały padobnaha kštałtu kaštujuć na sajcie ad 1000 rubloŭ.
«My mierkavali, što čytačy samastojna prymuć rašeńnie, ci varta naviedvać ŭstanovu. Razam z tym my nie možam nie zaŭvažyć, što navat u takim farmacie materyjał zakranaje pačućci niekatorych našych čytačoŭ, jakija paličyli niedapuščalnym adkryćcio ŭstanovy ŭ niepasrednaj blizkaści ad Kurapataŭ, miescy masavych rasstrełaŭ biełarusaŭ u mižvajenny pieryjad. Relax.by — sajt pra restarany, modu, zabavy, haradskoje žyćcio. Značny palityčny i hramadski rezanans nie źjaŭlajecca dla nas redakcyjnaj metaj. Pavažajučy pačućci i pazicyju našych čytačoŭ, my pryniali rašeńnie vydalić materyjał z sajta», — paviedamlaje tekst, jaki zamianiŭ artykuł pra restaran.
