Biznesoviec Arkadź Izrailevič abvinavaciŭ TBM u raskručvańni «sijanisckaj zmovy» praź situacyju ŭ Kurapatach

Arkadź Izrailevič — adzin ź vidnych biznesoŭcaŭ Biełarusi. Pavodle rejtynha partała ej.by, jon zajmaje 98-je miesca siarod samych upłyvovych i paśpiachovych biznesmenaŭ krainy. Izrailevič układvaje hrošy ŭ nieruchomaść («Viktoryja Płaza», žyłyja damy), a taksama ŭ handal naftapraduktami.

Pavialičyć

Na hety raz Izrailevič vystupiŭ z publikacyjaj na sajcie ej.by, dzie apisaŭ svajo staŭleńnie da restarana ŭ Kurapatach, a taksama tych ludziej, jakija jaho pabudavali. Nahodaj staŭ artykuł na sajcie «Novaha časa» Dzianisa Ivašyna «Znajomciesia: heta jany zabudoŭvajuć Kurapaty».

Arkadź Izrailevič źjaŭlajecca adnym ź biznes-partnioraŭ Leanida Zajdesa i Barysa Surysa, jakija i ŭkłalisia ŭ budaŭnictva restarana «Pajedziem pajadzim» u Kurapatach.

Izrailevič pryznajecca, što dobra viedaje ŭłaśnikaŭ restarana, ale naziraŭ za situacyjaj zboku. Pry hetym žartavaŭ, što ŭłaśniki pavinny biaspłatna nakarmić pratestoŭcaŭ za rekłamu.

Biznesmen aburajecca publikacyjaj Ivašyna: «Čytajučy hety tekst, ja niekalki razoŭ łaviŭ siabie na dumcy, što voś jašče ledź-ledź i dalej u artykule budzie vysnova, što heta my, habrei, rasstrelvali ŭ Kurapatach biaźvinnych biełarusaŭ, tamu zaraz tak i imkniemsia schavać ślady svaich złačynstvaŭ. Ale nie, nie daciahnuŭ aŭtar. Choć, viadoma, jon małajčyna, taki hłyboki analityčny rozum, nie rozum navat, a rozumišča! A talent vialiki jaki!»

Izrailevič vyčytaŭ, što zasnavalnikam «Novaha času» źjaŭlajecca Minskaja haradskaja arhanizacyja TBM, tamu pytajecca ŭ staršyni Aleny Anisim: «Navošta vy sprabujecie sabrać da kučy jak maha bolš habrejaŭ i stvaryć u našaj krainie niejkuju sijanisckuju zmovu?»

Jon adznačaje, što siarod zasnavalnikaŭ «Pajedziem pajadzim» chapaje i biełarusaŭ, i ruskich, a nie tolki habrei. Pry hetym jon pačynaje pieravodzić strełki, čamu «historyki nie zajmajucca «Jamaj», mohiłkami na Bieraścianskaj, a mienavita Kurapatami».

«Kali ja pačynaŭ pravodzić hramadskija abmierkavańnia pierad budaŭnictvam abjektaŭ, to ŭ ofisie niaźmienna źjaŭlalisia chłopčyki, jakija prapanoŭvali damovicca abo padymuć verchał na ŭsiu krainu. Pry tym adny i tyja ž asoby byli to historykami, to ekołahami, to miascovymi žycharami, choć i žyli ŭ hadzinie jazdy na taksi ad abjekta budaŭnictva. A paśla taho jak ja ich pasyłaŭ, niaźmienna źjaŭlalisia adny i tyja ž videakamiery, adny i tyja ž žurnalisty», — adznačaje Izrailevič.

Pry hetym jon adznačaje, što chacieŭ by pahladzieć na reakcyju aktyvistaŭ, jakija kupiać kvateru, a taja «raptam apyniecca ŭ achoŭnaj zonie jakoha-niebudź ŭčora znojdzienaha pachavańnia». Voś tak biznesoviec adhukajecca pra Kurapaty.

Admietna, što Arkadzia Izraileviča padtrymaŭ redaktar ej.by Siarhiej Sacuk, jaki ličyć, što «Novy čas» sapraŭdy hraje na habrejskim pytańni. Tym časam były načalnik upraŭleńnia «K» MUS Ihar Parmon adznačaje, što ŭ publikacyi słova «habrej» nie zhadvajecca ni razu. Na što Sacuk skazaŭ, što dla hetaha chapaje nazvać tolki imia «Maisiej» ci proźvišča «Levin» i zusim nie abaviazkova zhadvać nacyjanalnaść.

• 0
• 0
• 0
• 0
• 0
• 0
• 0
• 0