Kandrusievič piša, što pytańni abarony instytuta siamji, maralnaha vychavańnia dziaciej i moładzi chvalujuć usich nas, bo siamja źjaŭlajecca asnovaj hramadstva, a maładoje pakaleńnie — jaho budučyniaj. Jon ličyć, što abmierkavańnie takich važnych dla našaha hramadstva zakonaprajektaŭ pavinna vieścisia z udziełam pradstaŭnikoŭ tradycyjnych dla Biełarusi vieravyznańniaŭ, jakija na praciahu stahodździaŭ prapaviedujuć fundamientalnyja siamiejnyja kaštoŭnaści i vučać takim adnosinam pamiž členami siamji, jakija vyklučajuć hvałt. Mitrapalit zaŭvažyŭ, što hetyja zakonaprajekty pakul što niedastupnyja dla hramadskaści, što sparadžaje raznastajnyja čutki i zdahadki.
«Zrazumieła, što pry lubych źmienach u zakanadaŭstvie nieabchodna kiravacca nacyjanalnymi intaresami i ŭličvać duchoŭnyja kaštoŭnaści biełaruskaha naroda, a nie iści ŭśled za zhubnymi siekularnymi tendencyjami, u tym liku za hiendernaj ideałohijaj, jakaja viadzie da razbureńnia tradycyjnaj siamji. Tamu vielmi spadziajusia, što biełaruskaje zakanadaŭstva jašče bolš vyrazna pastavić pieraškodu prapahandzie nietradycyjnych sieksualnych pavodzinaŭ, afišavańniu i pazityŭnamu pakazu sadomskaha ładu žyćcia»,
— piša Kandrusievič.
Mitrapalit miarkuje, što «zadaču zachavańnia i adradžeńnia siamji, a taksama tradycyjnych siamiejnych i maralnych kaštoŭnaściaŭ našamu hramadstvu davodzicca vyrašać u niaprostych sacyjalna-ekanamičnych abstavinach i va ŭmovach prapahandy antychryścijanskaj siamiejnaj ideałohii i tendencyj pryniaćcia zakanadaŭčych aktaŭ, jakija supiarečać tradycyjam biełaruskaha naroda».
Kandrusieviču chaciełasia b paznajomicca z prapanovami adnosna novaj kancepcyi zakona ab baraćbie z chatnim hvałtam, kab mieć mahčymaść hruntoŭna i ŭsiebakova ich abmierkavać u pracesie adkrytaj dyskusii. Jon baicca, što kali niekatoryja źmieny, pra jakija viadziecca dyskusija ŭ ŚMI, nabuduć siłu zakona, to jany mohuć pryvieści da niespraviadlivaha pieraśledu dobrasumlennych baćkoŭ za samaje niaznačnaje i biaskryŭdnaje «pakarańnie» dziciaci ŭ metach jaho biaśpieki, vychavańnia i dyscypliny.
«Katalicki Kaścioł hatovy prymać udzieł u abmierkavańni zakanadaŭčych prajektaŭ, u tym liku skiravanych na abaronu instytuta siamji»,
— piša mitrapalit u liście.
