Jak paviedamiŭ «Našaj Nivie» žychar Minska Juljan Misiukievič, tolki što byŭ zatrymany pradprymalnik Źmicier Daškievič. Jaho dastavili ŭ adździaleńnie milicyi Baraŭlan (Minski rajon) i abvinavacili ŭ niezakonnym pikietavańni (art. 23.34 Administratyŭnaha kodeksa) zabaŭlalnaha centra «Pajedziem pajadzim», jaki praciŭniki jaho raźmiaščeńnia nazyvajuć «restaranam na kaściach».
Raniej byŭ zatrymany žychar Vaŭkavyska Valeryj Žabrak, jaki vioz z Kurapat raściažku z nadpisam «Kurapaty — daroha śmierci». Daškievič ź siabrami pajechaŭ vyśvietlić los Žabraka, i tady zatrymali ŭžo i jaho.
Źmicier Daškievič ź siabrami pikietavaŭ restaran «Pajedziem pajadzim» usiu druhuju pałovu dnia piatnicy 22 červienia. Jon vioŭ ź miesca padziej žyvyja videarepartažy. Voś videa palemiki z prysłanym na abaronu restarana staršyniom sielsavieta:
A voś inšyja videa ź miesca padziej, poŭnyja humaru:
A heta strym Stasia Karpava:
Milicyja pratestoŭcaŭ suprać zabaŭlalnaha centra nie razhaniaje, ale sprabuje vydušyć ź placoŭki štrafami.
Siarod ludziej, na jakich skłali pratakoły, palityk Pavieł Sieviaryniec (11 pratakołaŭ), žychar Łahojska Dzianis Urbanovič (7 pratakołaŭ), žycharka Minska Natalla Haračka (6 pratakołaŭ). Inšyja «zapratakalavanyja» — palityki Aleś Łahviniec, Alaksiej Janukievič, Ryhor Kastusioŭ, žychar Vilejki Alaksiej Siudak, žychary Minska Juraś Čavusaŭ, Aleś Taŭstyka, Leanid Kułakoŭ, Valer Rabcaŭ, Dzianis Kraŭčuk, Maja Navumava, Kaciaryna Andrejeva, Siarhiej Aniankoŭ, Aleh Korban, Anatol Mirašničenka, Źmicier Kazakievič, Vital Paŭłaŭ, Aleś Turovič, Jaŭhien Batura, Dzianis Sadoŭski, Volha Nikałajčyk dy inšyja. Usie hetyja zachady fiksujuć pravaabaroncy-viasnoŭcy.
Pratakoły składalisia pa artykułach 17.1 (drobnaje chulihanstva), 23.4 (niepadparadkavańnie zakonnamu patrabavańniu słužbovaj asoby), 18.34 KaAP (znachodžańnie na prajeznaj častcy), 23.34 (udzieł u niesankcyjanavanym masavym mierapryjemstvie) dy inšych.
Ziamlu pad zabaŭlalny centr la MKADa kala miesca masavych rasstrełaŭ hramadzian u 1937—1941 hadach Minski rajvykankam vydzieliŭ u kancy 2000-ch. U 2012 namieśnik hienprakurora rekamiendavaŭ uładam Minskaha rajona i vobłaści spynić budaŭnictva i ŭkazvaŭ na parušeńni pry vydzialeńni ziamli, ale kiraŭniki Minskaj vobłaści praihnaravali hety zvarot. Naadvarot, pry ministru Śviatłovie Ministerstva kultury zaćvierdziła takija miežy achoŭnych zon vakoł Kurapat, pry jakich restaran moh zastavacca stajać.
Zbudavany restaran nazvali spačatku «Bulbaš-chołam», ale ŭ vyniku hramadskich pratestaŭ tak i nie adkryli, jon prastajaŭ 4 hady pustym. Novaja sproba adkryć jaho adbyłasia hetym letam. Praciŭniki hetaha dziažurać na placoŭcy kala zabaŭlalnaha centra, infarmujuć ludziej pra Kurapaty i błakujuć bramu kompleksu. Jany taksama sprabavali kryžami zabłakavać palavy padjezd da miesca zabaŭ.
U Kurapackim lesie u brackich mahiłach lažać pareštki dziasiatkaŭ tysiač ludziej, rasstralanych savietami.
Ludzi patrabujuć pieranieści ci pieraprafilavać budynki «Pajedziem pajadzim». Z asudžeńniem adkryćcia restarana vystupili šmatlikija intelektuały i hramadskaja dziejačy — ad Śviatłany Aleksijevič da Mikałaja Čarhinca i Viačasłava Kiebiča. Ź imi salidaryzavalisia biznesoŭcy Juryj Zisier i Viktar Prakapienia. Adnak ułady pakul nie zrabili nijakich krokaŭ pa praviercy zakonnaści vydzialeńni placu pad zabudovu.
Čytajcie taksama:
«Kvoty pieravykanany»: kašmarnyja archiŭnyja dakumienty pra 1937 hod u Biełarusi
Haspadar skandalnaha restarana ŭ Kurapatach — 54-hadovy biznesmien Leanid Zajdes
Skandał u Kurapatach: kolišniaja televiadučaja BT i jaje muž-biznesmien najechali na aŭto na dvuch pikietoŭcaŭ
Prakuratura patrabavała ad Batury spynić budaŭnictva «Bulbaš-choła», ale toj nie spyniŭ
Źmicier Daškievič: Nam treba krytyčna acanić svaje siły ŭ supraćstajańni z bulbašžoram
