Barys Batura, fota sajtu savietu respubliki |
Barys Batura naradziŭsia ŭ 1947 hodzie ŭ Vaŭkavysku. Skončyŭ Biełaruski palitechničny instytut pa specyjalnaści inžyner‑mechanik (1970). Z 1973 pa 1979 — načalnik Vaŭkavyskaha kambinatu kamunalnych pradpryjemstvaŭ. Z 1979 pa 1987 — na roznych pasadach va ŭpraŭleńnia žyllova‑kamunalnaj haspadarki Haradzienskaha abłvykankamu. Z 1987 pa 1990 — namieśnik ministra žyllova‑kamunalnaj haspadarki BSSR, namieśnik staršyni Haradzienskaha abłvykankamu. Z 1990 pa 1999 — ministar žyllova‑kamunalnaj haspadarki Biełarusi. Z červienia 1999 pa listapad 2000 — namieśnik premjer‑ministra. Kastryčnik — listapad 2000 — pradstaŭnik dziaržavy ŭ AAT «Biełbiznesbank». Ad 13 listapada 2000 — staršynia Mahiloŭskaha abłvykankama (zaniaŭ miesca Michaiła Dražyna). Uznačalvaje federacyju valejbołu.
U saviet respubliki heta sklikańnia Barys Batura trapiŭ pa «kvocie Łukašenki». Pryznačeńnie adbyłosia tolki na minułym tydni. Zrešty, jašče napiaredadni mnohija šaptalisia, što mienavita Batura zojmie pasadu śpikiera i pakinie svaju pasadu ŭ Mahilovie. Darečy, na pasadu «hubernatara» Mahiloŭščyny svatajuć Uładzimiera Kanaplova, jaki apošnim časam zastaŭsia nie pry spravach. Druhim pretendentam nazyvajuć vice‑premjera Ivana Bambizu.
U svoj čas, kali Baturu pryznačali kiraŭnikom Mahiloŭščyny, vobłaść apynułasia ŭ ekanamičnaj jamie. Adnak za hady kiravańnia Batury kryzys atrymałasia pieraadoleć. Vobłaść maje niakiepskija pakaźniki ŭ halinie haspadarki, adna ź pieršych u krainie pa ŭciahvańniu zamiežnych investycyj, najpierš rasiejskich. Uvohule, Batura maje dobryja kantakty z rasiejskimi biznesoŭcami. Jamu taksama atrymlivajecca łabiravać mahiloŭskija tavary na rynku susiedniaj krainy.
Mnohija adznačajuć intelihientnaść Batury. Za čas jahonaha znachodžańnia na pasadzie staršyni abłvykankamu abličča Mahilovu źmianiŭsia tolki ŭ lepšy bok. Usio ž haradzieniec.
Z admoŭnych rysaŭ novaha śpikiera adznačajuć umiešvańnie ŭ spravu svaich padnačalenych, časam padaŭlaje «nizavuju» inicyjatyvu.
Kažuć, što ŭ adstaŭku Batura prasiŭsia jašče ŭ 2006 hodzie, ale Łukašenka ŭhavaryŭ jaho pakiravać vobłaściu jašče dva hady. Sam Baturu tuju sytuacyju prakamentavaŭ nastupnym čynam: «Ja ničoha nie planuju. U nas prezydent usio planuje…».
Mabyć, i ciapier dla Batury «zaplanavali» nia samuju pylnuju i adnačasova pačesnuju pasadu śpikiera vierchniaj pałaty.
Vice-śpikieram savietu respubliki abrany adyjozny namieśnik kiraŭnika Administracyi prezydenta Anatol Rubinaŭ.