U redakcyju «Našaj Nivy» źviarnuŭsia čytač, jaki paviedamiŭ, što 27 červienia siłavikami byŭ zatrymany staršynia Brasłaŭskaha rajvykankama Uładzimir Dranieŭski.
Uładzimir Dranieŭski. Fota vitvesti.by.
Nibyta havorka viałasia pra toje, što Dranieŭskaha razam z žonkaj, a taksama niekatorymi padnačalenymi vyvodzili prosta z budynka rajvykankama.
«NN» spraŭdziła hetuju infarmacyju ŭ dvuch roznych krynicach u Brasłavie. Usie paćviardžajuć, što Dranieŭski sapraŭdy zatrymany.
Kiraŭnik adździełu infarmacyi i suviaziaŭ z hramadskaściu centralnaha aparatu Śledčaha kamiteta Siarhiej Kabakovič skazaŭ, što moža dać infarmacyju, ci sapraŭdy zatrymany kiraŭnik Brasłaŭskaha rajona, tolki 4 lipienia, kali skončacca vialikija vychodnyja.
Uładzimir Dranieŭski adstuničaŭ na paradzie, jaki prachodziŭ u Brasłavie 3 lipienia z nahody Dnia Niezaležnaści. Abmiarkoŭvajecca zatrymańnie čynoŭnika i ŭ brasłaŭskich sacyjalnych sietkach.
Nieaficyjna viadziecca havorka, što «mera» mahli zatrymać za chabar. Dakładna viadoma, što čynoŭnik budavaŭ sabie dom.
Uładzimiru Dranieŭskamu 41 hod. Jon rodam z Čašnikaŭ. Skončyŭ Sielskahaspadarčuju akademiju ŭ Horkach pa śpiecyjalnaści «Miechanizacyja mielijaratyŭnych i vodahaspadarčych rabot» i «Buchhałtarski ŭlik».
Doŭhi čas pracavaŭ u rodnym horadzie na pasadach, źviazanych z ŽKH. U 2011 byŭ nazvany «Čałaviekam hoda Viciebščyny». Žanaty, maje dvaich dziaciej.
U 2015 hodzie Dranieŭski staŭ staršynioj Brasłaŭskaha rajvykankama. Brasłaŭ — rajon viadomy svaim turystyčnym patencyjałam, dziakujučy vialikaj kolkaści malaŭničych azior. U rajonie naličvajecca ažno 305 ahrasiadzib.
«Šanuju ŭ śpiecyjalistach zdolnaść bačyć i abjektyŭna aceńvać situacyju, adstojvać svoj punkt hledžańnia i pierakonvać u svajoj praŭdzie. Addaju naležnaje sumlennym i pramym ludziam», — kazaŭ Dranieŭski ŭ adnym ź intervju.