U stalicy Turkmienistana i abłasnych administracyjnych centrach zabaranili prodaž ałkaholnych napojaŭ. Jak paviedamlaje Radyjo Azatłyk, pavodle vusnaha zahadu, turkmienskija ŭłady viaduć pracu pa kanfiskacyi śpirtnych napojaŭ z pryłaŭkaŭ handlovych punktaŭ.
Ciapierašni etap baraćby suprać prodažu ałkaholu ŭ krainie pačaŭsia paśla pryniaćcia 5 lipienia «Nacyjanalnaj prahramy pa prafiłaktycy škodnaha ŭździejańnia ałkaholu ŭ Turkmienistanie na 2018—2024 hady».
Pra toje, jak viadziecca nieaficyjnaja, ale surjoznaja šyrokamaštabnaja baraćba suprać prodažu ałkaholu, spasyłajučysia na słovy ŭładalnikaŭ kram, raspavioŭ naziralnik z Ašchabada Amanmurat Buhajeŭ.
«U paniadziełak [9 lipienia] niekalki ŭładalnikaŭ mahazinaŭ raskazali, što buduć adbirać ałkahol z pryvatnych kramaŭ. Jość razmovy, što chočuć sabrać śpirtnyja napoi z usich pryvatnych kram, ja taksama siońnia ŭviečary paśla zakryćcia bazaru źbirajusia pavieźci ŭvieś ałkahol sa svajoj kramy», — skazaŭ mnie adzin znajomy handlar», — raspavioŭ Amanmyrat Buhajoŭ.
Pavodle jaho słoŭ, uśled za paviedamleńniami ab kanfiskacyi śpirtnych napojaŭ, na nastupny dzień sapraŭdy pačalisia rejdy.
Karespandent Azatłyk u Ašchabadzie vyśvietliŭ niekatoryja padrabiaznaści mahčymych pryčyn aktyvizacyi baraćby z prodažam ałkaholu ŭ krainie.
U Turkmienistanie ŭ apošnija niekalki miesiacaŭ pavialičylisia vypadki atručvańnia ludziej śpirtnymi napojami, navat byli vypadki sa śmiarotnym vynikam. Asabliva šmat takich vypadkaŭ było ŭ niekatorych rajonach Dašahuz, Lebapa i Mary.
«Paviedamlajuć, što ŭ krainu byŭ ŭviezieny mietyłavy śpirt. I, mahčyma, jaho vykarystoŭvali zamiest etyłavaha śpirtu. U vyniku było šmat vypadkaŭ atručvańniaŭ, navat śmiarotnyja vypadki. Pa hetaj pryčynie pravodziacca pravierki na rynkach, u pryvatnaści byli kanfiskavanyja ałkaholnyja tavary nieviadomaha pachodžańnia», — dadaŭ žurnalist.
