Pierajechali ŭ Minsk, źniali kvateru i płanujecie zarehistravacca ŭ miascovaj paliklinicy, kab atrymlivać biaspłatnuju miedycynskuju dapamohu. Jak u hetym vypadku dziejničać, kudy źviartacca?
Ci možna zamacavacca za paliklinikaj nie pa miescy rehistracyi?
Vy majecie prava vybirać, u jakoj paliklinicy absłuhoŭvacca: ci pa miescy pražyvańnia, ci pa miescy rehistracyi. Ale treba viedać, što absłuhoŭvańnie ŭ paliklinicy nie pa miescy rehistracyi maje peŭnyja niuansy.
Pieršaje, što vam nieabchodna zrabić, kab zamacavacca za paliklinikaj, jakaja adnosicca da vašaha faktyčnaha adrasa pražyvańnia, — pryjści tudy i napisać zajavu. Kab nie hublać čas, lepš zahadzia patelefanavać u rehistraturu i ŭdakładnić čas pryjomu zajaŭ na zamacavańnie i numar kabinieta, dzie heta pracedura ažyćciaŭlajecca.
Zvyčajna kabiniety, dzie adbyvajecca rehistracyja, znachodziacca ŭ administracyjnaj častcy palikliniki. Pobač na stoliku lažać błanki z uzoram zapaŭnieńnia zajavy. Jana pišacca na imia hałoŭnaha doktara z ukazańniem źviestak ab rehistracyi i miescy pražyvańnia, u jakoj paliklinicy absłuhoŭvalisia raniej.
Darečy, ludzi stałaha vieku, jakich dzieci na zimu zabirajuć ź viosak u haradskija kvatery, taksama mohuć chadzić na pryjom da doktara ŭ miascovuju palikliniku. Patrebna taja ž zajava na imia hałoŭnaha doktara. Ciažarnyja žančyny majuć prava stać na ŭlik va ŭpadabanuju kansultacyju.
Jakija dakumienty patrebny, kab zamacavacca za paliklinikaj?
Z saboj u palikliniku nieabchodna ŭziać pašpart. Vas mohuć paprasić pakazać damovu arendy žylla. Darečy, hety momant nosić rekamiendacyjny charaktar. Robicca heta najpierš dla taho, kab paźbiehnuć niepryjemnych situacyj. Naprykład, niechta nazvaŭ čužy adras, a paśla da administracyi palikliniki mohuć być pretenzii z boku sapraŭdnych žycharoŭ kvatery, jakija daznalisia pra «kvatarantaŭ». Tamu ŭ paliklinicy i prosiać mieć jakoje-niebudź paćviardžeńnie, što vy žyviacie pa ŭkazanym adrasie. Heta moža być nie tolki damova arendy žylla, ale i kvartpłata, kopija pašparta muža, žonki, svajaka ŭ kvatery jakoha vy žyviacie. Taksama haspadar kvatery moža pryjści sam i paćvierdzić vaša miesca pražyvańnia (u vusnaj ci piśmovaj formie).
Na sajcie palikliniki možna znajści ałharytm dziejańniaŭ dla zamacavańnia, dzie ŭsio raśpisana pakrokava, paznačany čas pryjomu, taksama tam možna spampavać formu zajavy, kali vy chočacie jaje zapoŭnić zaranioŭ. Cikavy fakt: dla mužčyn i dla žančyn isnujuć asobnyja formy zajaŭ. Rašeńnie ab zamacavańni za paliklinikaj pavinna być pryniata ciaham adnaho dnia z momantu vašaha zvarotu.
Infarmacyju pa hetym pytańni znajści na sajcie Ministerstva achovy zdaroŭja.
Jaki termin dziejničaje zamacavańnie za paliklinikaj?
Jak praviła, zamacavańnie za paliklinikaj dziejničaje tolki hod. Praciahnuć dazvoł na absłuhoŭvańnie pa adrasie zamacavańnia nieabchodna nie paźniej za 7 dzion da skančeńnia terminu. Treba adznačyć, što niama nijakich narmatyŭnych aktaŭ, jakija abmiažoŭvać termin zamacavańnia. Administracyja palikliniki samastojna vyrašaje, na jaki termin zamacoŭvać čałavieka, usie vypadki indyvidualnyja. Naprykład, vas mohuć zamacavać za paliklinikaj na termin dziejańnia damovy arendy žylla.
Što rabić, kali niama damovy arendy žylla?
A što rabić, kali vy zdymajecie kvateru biez damovy arendy i ničoha, aproč pašparta, pradjavić nie možacie? Pamiatajcie, što rekamiendacyi pakazać inšyja dakumienty, što paćviardžajuć pražyvańnie pa dadzienym adrasie, nosiać rekamiendacyjny charaktar. Tamu vy majecie prava padać zajavu na zamacavańnie za paliklinikaj. Administracyja ŭstanovy jaje razhledzić i daść vam adkaz.
Ci možna zamacavacca za ŭpadabanaj paliklinikaj?
Naprykład, vy žyviacie va Uruččy, a chočacie absłuhoŭvacca ŭ Kamiennaj Horcy. Možna. Ale z vyklikami na dom mohuć uźniknuć pytańni. Paliklinika zabiaśpiečvaje akazańnie miedycynskaj dapamohi zhodna sa svaimi lačebna-dyjahnastyčnymi mahčymaściami. Tamu ŭ hetym vypadku kiraŭnik palikliniki prymaje rašeńnie ab zamacavańni ci admovie ad absłuhoŭvańnia.
Što rabić, kali nieabchodna ekstrannaja dapamoha?
Kali vy nie paśpieli zarehistravacca ŭ paliklinicy, i vam spatrebiłasia ekstrannaja dapamoha, to jaje vam akažuć biaspłatna. Naprykład, raptam źjaviŭsia mocny bol, padniałasia tempieratura — źviartajeciesia ŭ najbližejšuju palikliniku, dzie vam pryznačać lačeńnie i vyrašać pytańnie vašaj niepracazdolnaści.
Ci možna biaspłatna zrabić fluarahrafiju ŭ luboj paliklinicy?
Kali situacyja ekstrannaja — fluarahrafiju pryznačyŭ doktar, to biaspłatna. A kali vy sami vyrašyli abśledavacca nie ŭ svajoj paliklinicy, to za praceduru daviadziecca zapłacić. Takija voś praviły.
Nie chvarejcie i vyrašajcie ŭsie pytańni ź lohkaściu!
