Rehnumaviec Paŭłaviec napisaŭ zajavu ŭ milicyju na Piatroŭskaha i Dziermana
Publicyst, historyk, aŭtar rasijskaha internet-resursu Regnum Juryj Paŭłaviec na svajoj staroncy ŭ fejsbuku paviedamiŭ, što źviarnuŭsia ŭ milicyju z zajavaj na inšych prarasijskich publicystaŭ Piatra Piatroŭskaha i Alaksieja Dziermana. Kali sprava «Rehnuma» tolki nabirała abaroty, to Piatroŭski i Dzierman časta vystupali ekśpiertami pa joj u dziaržaŭnych ŚMI. I jak miarkuje Paŭłaviec, paklopničali na jaho.
«Jasnaja sprava, što ŭ zaviadzieńni spravy mnie było admoŭlena, ale toje, što nieśli hetyja dva tavaryšy, zamiłoŭvaje. Bolš za toje, skažu, što ich adkaz ciapier daŭ dadatkovyja mahčymaści vykryć ich u chłuśni i paklopie i praciahnuć pačataje», — napisaŭ Paŭłaviec.
«Vykazvańni Piatroŭskaha P.S. byli vyklučna ekśpiertnymi i navukovymi, termin «vialikadziaržaŭny šavinist» aznačaje hreblivyja adnosiny pradstaŭnika adnoj nacyi da pradstaŭnikoŭ inšaj, i hety termin byŭ zamacavany ŭ humanitarnaj navucy jašče za časami SSSR. Termin «biełarusafob» aznačaje niehatyŭnyja, hreblivyja adnosiny da Biełarusi, biełaruskaj movy, kultury, identyčnaści. Termin «biełahvardziejec» u hetym kantekście aznačaje toje, što biełahvardziejcy ŭ čas hramadzianskaj vajny admaŭlalisia pryznać suvierenitet biełarusaŭ», — takaja cytata padajecca z tłumačeńniaŭ Piatra Piatroŭskaha.
Alaksiej Dzierman taksama rastłumačyŭ, što ŭ publikacyjach Paŭłaŭca ŭtrymlivałasia infarmacyja, jakaja była «nakiravanaja na raspalvańnie mižnacyjanalnaj varažniečy pamiž ruskimi i biełaruskami, a taksama hreblivaje staŭleńnie da biełaruskaj kultury, movy, histaryčnych kaštoŭnaściaŭ».
Juryj Paŭłaviec razam ź Dźmitryjem Alimkinym i Siarhiejem Šyptenkam byŭ asudžany da 5 hadoŭ z adterminoŭkaj za dziejańni, nakiravanyja da raspalvańnia mižnacyjanalnaj varažniečy. Da zatrymańnia Juryj Paŭłaviec pracavaŭ vykładčykam u BDUIRy.
Alaksiej Dzierman i Piatro Piatroŭski — publicysty, jakija pišuć na radykalna-prarasijskija sajty «Imchakłub» i «Jeŭrazija. Ekśpiert».
Kamientary