 |
Alaksandr ad 27 kastryčnika znachodzicca ŭ mienskim śledčym izalatary. Jaho jak i 13 inšych udzielnikaŭ spravy, abvinavacili ŭ arhanizacyi hrupavych dziejańniaŭ, jakija nibyta paciahnuli masavyja biesparadki padčas akcyi pradprymalnikaŭ 21 studzienia.
Sudzić Alaksandra Barazienku budzie sudździa Centralnaha sudu Miensku Valery Jeśman.
U kryminalnaj spravie, jakuju nazvali «spravaj 14‑ci» pakarali 13 čałaviek, u tym liku niepaŭnaletniaha Maksima Dašuka. Śledztva raspačali adrazu paśla akcyi pradprymalnikaŭ 21 studzienia. U sakaviku pakarali 10 čałaviek, a ŭ krasaviku — jašče troch.
Alaksandr Barazienka padčas śledztva znachodziŭsia ŭ Polščy. Jon ‑‑ student Urocłaŭskaha ŭniversytetu. Paśla taho, jak Alaksandra adličyli ź pieršaha kursu BDU za ŭdzieł u studenckaj akcyi suprać skasavańnia lhotaŭ, jon pajechaŭ vučycca pa prahramie Kastusia Kalinoŭskaha.
27 kastryčnika Alaksandr sam pryjšoŭ na dopyt. Śledčy vystaviŭ jamu abvinavačańnie i abraŭ mieraj strymańnia aryšt.
Advakat Pavał Sapiełka ŭ «spravie 14‑ci» abaraniaŭ Paŭła Vinahradava, Arcioma Dubskaha i Alesia Čarnyšova. Jon raźličvaje, što sud nia budzie stroha karać jahonaha padabaronnaha Alaksandra Barazienku:
«Nia pieršy raz ja sustrakajusia z hetaj spravaj i, uličvajučy, što amal niama spadziavańniaŭ na apraŭdańnie, to raźličvaju, što tut chacia b uličać nieabchodnaść praciahu navučańnia majho padabaronnaha i pakarajuć jaho nia vielmi žorstka. Nia buduć jaho karać abmiežavańniem voli».
Baćka Alaksandra mieŭ ź im spatkańnie. Jon supakoiŭ žonku, što syn znachodzicca ŭ bolš mienš prymalnych umovach — ź im u kamery 10 čałaviek.
Havoryć maci Alaksandra Alena Barazienka:
«Švedar nam viarnuli, bo jon viazany. Pieradali jamu charčy i niekatoryja rečy, kab moh pieraapranucca. Kazaŭ, što nie choładna. Ja, kaniešnie, spadziajusia, što ŭsio abydziecca štrafam, bo treba ž vučycca. Pa‑mojmu, tam i niama za što davać niešta bolš surjoznaje.
Nijakaha złačynstva jon nia ździejśniŭ».
Ciaham tydnia stanie viadoma data sudovaha pasiedžańnia. Pakolki Alaksandr budzie adzin na łaŭcy padsudnych, to spravu mohuć razhledzieć ciaham adnaho dnia.
