Cikavuju historyju apavioŭ hramadski aktyvist z rajcentra Akciabrski Homielskaj vobłaści Andrej Pavuk. Nie tak daŭno jon napisaŭ skarhu ŭ sud na dziejańni Akciabrskaha rajvykankama, jaki nie puskaje Pavuka na adkrytyja pasiedžańni.
Andrej Pavuk. Fota facebook.com.
Na 14 žniŭnia byŭ pryznačany razhlad hetaj skarhi. Intaresy Pavuka ŭ sudzie źbiraŭsia pradstaŭlać homielski pravaabaronca Leanid Sudalenka. Sudździa ŭziaŭ 15-chvilinny pierapynak, kab pryniać rašeńnie, ci moža Sudalenka brać udzieł u pracesie.
U hety čas adzin z prysutnych u zale pabačyŭ i sfatahrafavaŭ papierku, jakuju zabyŭsia pamočnik prakurora Vadzim Šybut. Na hetaj papiercy ŭžo było pryniataje sudom rašeńnie, chacia sam praces nibyta ŭsio jašče praciahvaŭsia.
Andrej Pavuk chutka vykłaŭ hety dakumient u internet. Jon miarkuje, što i pamočnik prakurora, i sudździa ŭbačyli heta. Tamu było pryniataje rašeńnie pieranieści ahučvańnie rašeńnia na nastupny dzień. U tym dakumiencie, što zabyŭsia pamočnik prakurora, u skarzie Andreju Pavuku admaŭlali.
15 žniŭnia sudździa vyrašyŭ nie ahučvać rašeńnie, a… uziać samaadvod!
«U pracesie razhladu hramadzianskaj spravy sudu stała viadoma, što zajaŭnikam u internecie raźmieščanaja infarmacyja ab najaŭnaści ŭ prakurora, jaki braŭ udzieł u razhladzie skarhi, dakumienta, jaki zajaŭnikam byŭ rascenieny jak rašeńnie pa spravie, što vyklikała abmierkavańnie ŭ internecie. Pakolki dadzienaja publikacyja moža vyklikać sumnievy ŭ biesstaronnaści, sudździa zajaŭlaje advod ad udziele ŭ spravie», — napisana ŭ pastanovie.
Ciapier pavinien być pryznačany novy praces pa spravie. Sam Andrej Pavuk kaža, što nieviadoma, chto budzie razhladać praces, bo ŭ Akciabrskim na hety momant paprostu adzin sudździa.
