U piatnicu, 17 žniŭnia, u restaranie «Pajedziem, pajadzim» kala Kurapataŭ adbyłosia viasielle. Kala ŭročyšča, pa słovach Źmitra Daškieviča, uviečary byŭ salut. Tut.by daviedaŭsia, što na hety kont dumaje adzin z zasnavalnikaŭ restarana Leanid Zajdes.
Fota: Darja Burakina, Tut.by.
Lidar «Maładoha frontu» Źmicier Daškievič źniaŭ, jak na terytoryi restarana «Pajedziem, pajadzim» na ŭschodnim baku tancavała kampanija ludziej, a muzyka hučała pobač z kryžami, dzie stajaŭ Daškievič.
Uviečary aktyvist źniaŭ salut pablizu ŭročyšča Kurapaty. U kamientarach Daškieviču dasłali fotazdymki z pustymi skrynkami ad fiejervierku kala płota restarana, z boku darohi.
Paśla hetaha vypadku ŭ internecie źjaviłasia pietycyja, jakaja ŭžo sabrała bolš za 700 podpisaŭ i jakuju płanujuć nakiravać u Hienieralnuju prakuraturu. U zvarocie aktyvisty zaklikajuć zładzić pravierku, a taksama vypisać pradpisańnie ab zakryćci restarana STAA «Biełrestiinviest» z-za «nieadnarazovych parušeńniaŭ isnujučych abciažarańniaŭ, ukazanych u adkazie hienprakuratury ad 2018/07/13 pad numaram 0703-446-2012».
Raniej u adkazie aktyvistu Antonu Matolku Hienprakuratura paviedamlała, što ziamielny ŭčastak, dzie znachodzicca ŭstanova, maje abciažarańni ŭ vykarystańni.
— Z uschodniaha boku restarana vyklučajucca ŭsie vidy «hučnych mierapryjemstvaŭ», arhanizacyi adpačynku na adkrytym pavietry. Dadzienaje abmiežavańnie datyčycca ŭsich formaŭ adpačynku ŭ suviazi ź nieabchodnaściu vyklučyć parušeńnie sakralnaha charaktaru historyka-kulturnaj kaštoŭnaści, jakaja prymykaje z uschodniaha boku.
Leanid Zajdies: «Na padkantrolnaj mnie terytoryi salutu nie było»
Hetuju situacyju prakamientavaŭ adzin z zasnavalnikaŭ restarana Leanid Zajdes.
— Viasielle było, hetaha nichto nie admaŭlaje. A salutu nie było. Prytym viasielle na dzieviać čałaviek, heta chiba viasielle? Ludzi zrabili zakaz, pryjšoŭ mužčyna ŭ kaściumie, niaviesta ŭ biełaj sukiency, navat nie ŭ velumie. Mnie ich što, vyhnać? Jany prosta raśpisalisia. Hety videazapis zrobleny nie na majoj terytoryi. Jość maja terytoryja, za jakuju ja adkazvaju. Na padkantrolnaj mnie terytoryi salutu nie było.
Biznesmien kaža, što ŭ jaho jość videazapis, jaki heta paćviardžaje.
Zajdes tłumačyć, što dla jaho mierapryjemstva — heta kali arandujuć restaran, pryjazdžaje kartež, niaviesta ŭ velumie, śviedki, muzyka. «Ale hetaha nie było, nie adhadali», — padkreślivaje jon.
— A toje, što adbyvajecca za miežami terytoryi … Nu vy zrazumiejcie pravilna. Vyklikajcie tady milicyju, ja za tuju terytoryju adkaznaści nie niasu. A tak zvanaje viasielle, napeŭna, było. Ale jano było biez muzyki, bieź ničoha, televizar pracavaŭ. Było dzieviać čałaviek. Kartežu i limuzinaŭ nie było.
— Ci moh być fiejervierk, naprykład, kala zapraŭki?
— Napeŭna, takoje być mahło. Ja nie budu admaŭlać, ja tam nie prysutničaŭ.
Fota: Maja Kachno, Tut.by.
Zajdes padkreśliŭ, što abciažarańni ŭ vykarystańni terytoryi tyčacca tolki ŭschodniaha boku. Heta bok Kurapataŭ.
— Kali ja zajdu ź inšaha boku — z boku ŭvachodu, to abciažarańniaŭ niama. I salut mahu tam puskać pa łohicy. Nichto mnie ničoha nie zmoža tut skazać.
