Za karupcyjnyja złačynstvy ad pasad adchilenyja namieśnik hienprakurora Mikałaj Kupryjanaŭ, prakuror Mienskaj vobłaści Michaił Śniahir, namieśniki ministra ŭnutranych spravaŭ Alaksandar Ščurko i Viktar Filistovič, a taksama jašče šerah vysokich čynoŭnikaŭ MUS.
Z karupcyjaj u Biełarusi buduć zmahacca «žastačajšym vobrazam», zajaviŭ Łukašenka na naradzie «pa pytańniach efektyŭnaści ŭžyvanych mieraŭ pa baraćbie z karupcyjaj».
Łukašenka ŭ čaćvier byŭ u hnievie. «Aburaje karupcyja, jakaja razrastajecca siarod tych, chto pa doŭhu słužby pavinien zmahacca ź joj. U chabarnictvie akazvajucca zamiašanymi pradstaŭniki siłavych struktur, jakija zaklikanyja praduchilać padobnyja źjavy. Papiaredžvaju ŭsich: u Biełarusi takoha biespradziełu nia budzie! Navat u frahmentarnym paradku. Pa krajniaj miery, pakul ja prezydent.
Nie pahladžu ni na pasady, ni na čyny», — skazaŭ jon.
Łukašenku pryvioŭ kankretnyja fakty karupcyi siarod vysokich čynoŭnikaŭ prakuratury. «Prakurorski rabotnik za kapiejki kuplaje ŭ kamersanta całkam kamfartabelnuju kvateru z padziemnym haražom. Zdajecca, što ŭsio zakonna. Ale chiba nie naściarožvaje, čamu biznesoviec pradaŭ kvateru tańniej, čym jana kaštuje realna i dzie prakuror uziaŭ hetyja hrošy». Tut mieŭsia na ŭvazie prakuror Mienskaj vobłaści Michaił Śniahir.
Sa słovaŭ Łukašenki, hramadzianin Sidarovič, jaki pražyvaŭ u toj kvatery, źviartaŭsia nieadnarazova ŭ Centralny sud Miensku, ale sudździ Alena Iljina, Valery Jeśman, Taciana Paŭlučuk zajmali pazycyju Śniehira. Sidarovič vosiem razoŭ źviartaŭsia ŭ Hienprakuraturu, ale ŭsie dakumenty spravy śpisvalisia namieśnikam hienprakurora Kupryjanavym. Łukašenka kaža, što Śniahir buduje jašče adzin dom la Cnianskaha vadaschovišča, jaki
«vyhladaje ŭnušalniej za rezydencyju prezydenta».
Vinavacili Śniehira i ŭ tym, što da jaho źviartalisia siabry‑pradprymalniki z prośbaj prybrać kankurenta i admianić rašeńnie Vyšejšaha haspadarčaha sudu. Tady Śniehir prajaviŭ nadzvyčajnuju aktyŭnaść. U Vyšejšym haspadarčym sudzie spravu vyrašyć nia vyjšła praz «pryncypovuju pazycyju» Śmirnova (były namieśnik staršyni Vyšejšaha haspadarčaha sudu). Ale tut na dapamohu znoŭ pryjšoŭ Kupryjanaŭ.
«Navat kali ŭ vas uźniknie maleńkaja zakaručka i sumnievy, usio: kvatery, žyllo, mašyny pavinny być viernutyja ich uładalnikam», — skazaŭ Łukašenka.
Da kanca dnia Łukašenka daručyŭ hieneralnamu prakuroru Ryhoru Vasileviču vyzvalić ad zajmanych pasad namieśnika hienprakurora Mikałaja Kupryjanava i ŭsio taho ž Michaiła Śniehira. A taksama zavieści suprać abodvuch kryminalnyja spravy.
Było daručana staršyni Viarchoŭnaha sudu Valancinu Sukału vyzvalić ad pasad sudździaŭ Iljinu, Jeśmana i Paŭlučuk (usie jany byli zaplamlenyja palityčnymi pracesami, darečy, jak i Kupryjanaŭ dy Śniahir).
Nia mienšyja pieramieny čakajucca i ŭ Ministerstvie ŭnutranych spravaŭ. Ciaham listapada svaich pasadaŭ pazbaviacca pieršy namieśnik ministra Alaksandar Ščurko i jašče adzin namieśnik Viktar Filistovič. Łukašenka skazaŭ, što 10 vysokich čynoŭnikaŭ MUS pajšli na parušeńnie zakanadaŭstva, kab atrymać ziamielnyja działki ŭ Mienskim rajonie. Kiraŭnik dziaržavy nazvaŭ kankretnyja proźviščy. Aproč Ščurka i Filistoviča — heta byłyja namieśniki ministra Radziukievič, Hłuchoŭski, dyrektar departamentu finansaŭ i tyłu Mielnikaŭ, dyrektar departamentu pa hramadzianstvie i mihracyi Ivančykava, były dyrektar departamentu vykanańnia pakarańniaŭ Kaŭčur, były daradca ministra Karpiejčyk, doktar špitala MUS Burko, supracoŭnik HUUS Novik.
Łukašenka kaža, što padobnyja dziejańni hańba nia tolki dla kankretnaha čałavieka ci ŭstanovy, a «niezmyvalnaja plama na reputacyi ŭłady». Karupcyja heta pahroza palityčnaj i ekanamičnaj biaśpiecy krainy, poŭnaje raskładańnie dziaržaŭnaha aparatu, strata kantrolu nad ekanamičnym sektaram, ličyć kiraŭnik dziaržavy.
«Da čaho my dojdziem, kali baraćboj z karupcyjaj zajmajucca ludzi, jakija sami parušajuć zakony i normy marali?» — rytaryčna pytaŭsia Łukašenka.
Taksama było ahučana, što ad 1 studzienia Łukašenka budzie prymać rašeńni ab źmiakčeńni pakarańnia ŭ dačynieńni asudžanych za karupcyjnyja złačynstvy supracoŭnikaŭ pravaachoŭčych orhanaŭ.
«Raściahvańnia dziaržaŭnaj ułasnaści i «prychvatyzacyi» ŭ Biełarusi nia budzie. Liberalizujučy ekanomiku, nielha jaje addavać u ruki žulikaŭ i prachadzimcaŭ. Niekatoryja damaroščanyja apazycyjanery paśpiašalisia zajavić, što čakajecca namenklaturnaja pryvatyzacyja. Maŭlaŭ, usie «łasyja kavałački» padzielenyja miž čynoŭnikami. Supakojciesia, spadarstva! My nikoli hetaha nie dapuścim».
