Biełarus daviedaŭsia, što Ukantakcie zachoŭvaje ŭsiu vydalenuju infarmacyju. Kanflikt moža kaštavać sacsietcy da 20 miljonaŭ jeŭra

25 maja ŭ Jeŭrasajuzie pryniali novy zakon ab piersanalnych danych. Zhodna ź im, kožny hramadzianin ES moža zapytać u adpaviednych struktur i servisaŭ usiu infarmacyju pra siabie, jakuju tyja majuć.

Hramadzianie Biełarusi i Rasii takoj mahčymaści nie majuć. Ale biełarus Kryścijan Šynkievič, što žyvie ŭ Polščy, vyrašyŭ pacikavicca, jakija danyja pra jaho maje Ukantakcie.

Pavialičyć

Kali atrymaŭ adkaz, kaža Šynkievič, to byŭ šakavany.

«Jany zachoŭvajuć na mianie:

• usiu historyju źmieny imia i proźvišča na majoj staroncy;
• jakija hrupy adminiŭ / ci adminiu ciapier;
• jakija fajły zahružaŭ u VK, ź jakoha ip-adrasa, horada; zachoŭvajucca navat vydalenyja fajły;
• hałasavyja paviedamleńni z vydalenych pierapisak taksama zachoŭvajucca;
• adrasy ŭsich fota, pryčym prysyłajuć spasyłki, pa jakich možna pahladzieć fota navat biez rehistracyi ŭ VK;
• usie historyi ŭsich pierapisak, navat vydalenych, z usimi fajłami, jakija kali-niebudź dadavalisia, navat kali paśla fajły vydalaŭ;
• historyja parolaŭ da staronki;
• usie dopisy staronki i ŭsie kamientary da ich, navat vydalenyja»,

— paviedamlaje Šynkievič.

Jon upeŭnieny — jamu dasłali jašče nie ŭsiu infarmacyju.

«Aficyjnaja mabilnaja prahrama źbiraje infarmacyju ab hieałakacyi karystalnika, numary sim-kartak. Hetaha jany mnie nie dasłali, — kaža Šynkievič. — Plus tam šmat jašče čaho nie vysłali: maje kamientary da čužych pastoŭ, łajki, jakija ja staviŭ… Ja ŭpeŭnieny, što ŭsio heta zachoŭvajecca».

Kryścijan aburyŭsia tym, što Ukantakcie zachoŭvaje kožny krok, navat vydalenuju infarmacyju — i, značyć, pry patrebie vydaje heta ŭsio śpiecsłužbam. Jon apublikavaŭ post u svaim fejsbuku pra heta, jaki razyšoŭsia i pa rasijskich ŚMI.

Paśla chłopiec napisaŭ novy list da adminaŭ Ukantakcie, kab jamu vysłali reštu dadzienych. U adkaz jaho zabłakavali ŭ sacyjalnaj sietcy i pierastali adkazvać na listy elektronnaj pošty.

«Ukantakcie paviedamlaje, što heta abmiežavańnie dostupu ŭ suviazi z padazreńniem, što maja staronka była skradzienaja abo pradadzienaja. Ale dla mianie jany zabłakavali dostup da sajta, a nie jaje bačnaść, bo jany zaŭsiody błakujuć/abmiažoŭvajuć staronki z-za takich pryčyn (ź miortvym sabakam na zdymku profilu i nadpisam, što ŭlikovy zapis adklučany z-za padazronaj aktyŭnaści). Zabłakavana navat mahčymaść adnavić parol da svajho ŭlikovaha zapisu», — kaža Šynkievič.

Taksama jon aburajecca, što infarmacyju jamu dasłali z parušeńniem biaśpieki. Kali treciaja asoba pierachopić fajł, jaki nakiravaŭ jamu Ukantakcie, kab pahladzieć vydalenyja fotazdymki, navat nie treba budzie rehistravacca ŭ VK — usio pracuje i adkryvajecca pa spasyłkach.

U pačatku červienia Šynkievič źmianiŭ imia i proźvišča na svajoj staroncy ŭ VK. Ale kampanija vyrašyła, što jaho staronku mahli skraści tolki praz 35 dzion — paśla taho jon vykłaŭ post z abureńniami ŭ Fejsbuku. Raniej u VK padazreńniaŭ čamuści nie ŭźnikała.

Paśla taho, jak jaho zabłakavali i pierastali reahavać na listy, Šynkievič napisaŭ skarhu va Upraŭleńnie pa abaronie piersanalnych danych u Polščy. Adkaz jašče nie pryjšoŭ.

Jeŭrapiejskaje zakanadaŭstva nadzvyčaj strohaje — za parušeńnie «Ukantakcie» moža atrymać štraf pamieram da 20 miljonaŭ jeŭra albo 4% ad hadavoha abarotu. I ŭsio za toje, što kampanija nie pradastaviła Šynkieviču ŭsiu infarmacyju, jakaja zachoŭvajecca na siervierach.

• 0
• 0
• 0
• 0
• 0
• 0
• 0
• 0