Halivudski akcior i režysior Silviestr Stałone abviaściŭ pra chutki pačatak zdymak piataha filma pra Remba. Dziejańnie karciny hetym razam budzie adbyvacca ŭ Mieksicy.
«Prystupaju chutka i vielmi ŭschvalavany. Śviet, mahčyma, mianiajecca, ale nie jon… Ništo nie skončana!» — napisaŭ 72-hadovy Stałone ŭ svaim aficyjnym instahramie.
Nijakich inšych padrabiaznaściej ab novym filmie akcior nie pryvioŭ.
Pastareły vieteran Vjetnamskaj vajny Džon Remba žyvie na ranča ŭ Aryzonie i zmahajecca z posttraŭmatyčnym stresam. Raptam jon daviedajecca, što jaho ŭnučka źjechała ŭ Mieksiku na śviata i prapała.
«Zatym pačynajecca žorstki spusk u piekła, dzie Remba vyjaŭlaje złačynnuju sietku pa handlu ludźmi. Jon abjadnoŭvaje namahańni z žurnalistam, čyju siastru taksama zachapili, i vykarystoŭvaje ŭsie svaje navyki dla vyratavańnia dziaŭčat i baraćby z žorstkim kryminalnym lidaram», - havorycca ŭ sinopsisie da filma.
Pieršy film pra Remba — «Pieršaja kroŭ» - vyjšaŭ u prakat u 1982 hodzie i mieŭ vialiki pośpiech u hledačoŭ. U 1985 hodu vyjšła druhaja častka, a jašče praz try hady — treci epizod bajevika.
U 2007 hodzie Stałone vyrašyŭ adradzić najpapularniejšuju kinafranšyzu 1980-ch i źniaŭ čaćviorty film pra Remba, dzie vystupiŭ jak akcior, režysior i saaŭtar scenaryja. Mnohija ahladalniki raskrytykavali sikvieł za praźmierny hvałt na ekranie.
Ad filma da filma vorahi Remba stanavilisia ŭsio bolš mocnymi i šmatlikimi. Jaho antahanistam u pieršym filmie byŭ šeryf pravincyjnaha amierykanskaha haradka i miascovaja palicyja, u druhoj častcy jon užo zmahaŭsia z savieckimi vajskoŭcami ŭ Vjetnamie, u treciaj karcinie — znoŭ z savieckimi vajskoŭcami, ale ŭžo ŭ Afhanistanie. Narešcie, u čaćviortym sikviele jaho voraham stała cełaja armija birmanskich paŭstancaŭ.