Zialonyja arkušy ź piačatkami rajpa pryznačany dla raźliku ŭ kramach svajoj handlovaj sietki, paviedamlaje «Miedyja-Paleśsie».
Takija «siertyfikaty» vydajuć rabotnikam Łuninieckaha rajpa.
Pra padobnaje «nou-chau» paviedamili čytačy i dasłali fatahrafiju «siertyfikataŭ».
Čytačy kažuć, što sumu pakupak adnimuć z zarobku.
Vyhladaje «siertyfikat» jak zvyčajny arkuš A4 zialonaha koleru, razrezany na niekalki častak. Na im paznačana nazva arhanizacyi — Łuninieckaje rajpa, numar dakumienta (jaho na fota prykryli ŭ metach pryvatnaści) i suma.
Na tak zvanym «siertyfikacie» napisana: «Siertyfikat pradjaŭlajecca jak srodak apłaty rabotnikam sistemy ŭ pradpryjemstvach roźničnaha handlu Łuninieckaha rajpa». Na arkušy staić piačatka spažyvieckaha tavarystva i termin dziejańnia.
Aburanyja čytačy raspaviali, što atrymali takija «siertyfikaty» niadaŭna, i atavaryć ich treba pa 30 vieraśnia ŭklučna. Heta značyć, kupić u kramach rajpa na praciahu praktyčna dziesiaci dzion tavaraŭ na 50, 70 abo 100 rubloŭ, u zaležnaści ad sumy atrymanych siertyfikataŭ.
Kali va ŭładalnika takoha «siertyfikata», naprykład, na 10 rubloŭ, a suma pakupki mienšaja, reštu ŭ kramie nichto nie viernie.
Na dumku čytačoŭ, takija zachady rajpa robić, kab utrymać pakupnika pry bolšaj kankurencyi — nieŭzabavie ŭ horadzie zapracuje bujny mahazin inšaj handlovaj sietki.
Z prośbaj prakamientavać padobnaje rašeńnie Miedyja-Paleśsie nakiravała ŭ Łuninieckaje rajpa piśmovy zapyt, pa telefonie apieratyŭna rastłumačyć situacyju ŭ administracyi pradpryjemstva nie pažadali.
