Vital Taras u «NN» №19 zajaviŭ: «Žurnalist Alaksandar Fiaduta na sajcie «Naša dumka» pisaŭ, što abraza pačućciaŭ viernikaŭ nia moža mieć apraŭdańnia i ŭčynak apazycyjnaj hazety zasłuhoŭvaje adnaznačnaha asudžeńnia». Razam z hetym sp.Taras nia ŭvažyŭ za patrebnaje choć by pracytavać słovy taho samaha žurnalista.
Ja mierkavaŭ i miarkuju zaraz, što ŭ takich razoch – kali ty palemizuješ z čyimiści słovami – cytavać nieabchodna. Tamu mušu pracytavać samoha siabie naŭzdahon ciahniku sp.Tarasa:
«Ja asudžaju relihijnych fanatykaŭ, jakija dakazvajuć takim strašnym čynam, što chryścijanie źniavažyli ich vieru. Ale ja asudžaju i tych, chto – viedajučy pra toje – praciahvaje tyražavać hetyja niepamysnyja malunki».
Paŭtarusia: ja asudžaŭ i asudžaju palityčny akt, ździejśnieny čałaviekam, jaki iranizuje nad čužoj vieraj i navat nie sprabuje pry hetym zrazumieć, što ž mienavita tak źniavažyła viernikaŭ. I zusim nie adprečvaju prava publikavać LUBYJA teksty, što nie piarečać zakonu. Hetaha sp.Taras zaŭvažać nie žadaje.
Akramia taho, jon nie žadaje zaŭvažać i taho palitytyčnaha kantekstu, u katorym sp.Źdźvižkoŭ apublikavaŭ słavutyja karykatury. Aleś Kudrycki ŭ «NN» nadrukavaŭ pierakanaŭčy analiz toj sytuacyi.
Na žal, tady maje prahnozy zbylisia. Hazetu «Zhoda» zakryli. Chto skaža, što ad hetaha vyjhrała svaboda słova ci svaboda sumleńnia? I chto skaža, što vinoŭnikam hetaha zakryćcia byŭ nie sp.Źdźvižkoŭ, jaki ŚVIADOMA apublikavaŭ karykatury, što stali nahodaj dla zakryćcia hazety, u jakoj jon rabiŭ?
Sp.Taras taki vietlivy, što pryznaje: «Treba addać naležnaje Fiadutu: jon i ŭsie tyja, chto razvažaje padobnym čynam, u adroźnieńnie ad isłamskich fundamentalistaŭ, nie patrabujuć pakarać śmierciu aŭtaraŭ malunkaŭ ci redaktaraŭ hazetaŭ».
Vital Valancinavič, vy choć by pracytavali tut artykuł, jaki majecie na ŭvazie: «Usio vyšej skazanaje nia značyć, što BAŽ nia musić abaraniać prava sp.Źdźvižkova zastavacca na voli. Hłupstva i pravakacyja, im učynienyja, nie adprečvajuć prafesijnych stasunkaŭ «žurnalist – karparacyjnaja arhanizacyja».
To bok, «fundamentalist» Fiaduta zaklikaje BAŽ abaraniać pravy sp.Źdźvižkova. Heta vyklikaje ŭ sp.Tarasa ironiju? Jaho prava. Ale nia varta padmanvać čytača, prypisvajučy mnie toje, čaho ja nia mieŭ naŭviecie i navat nie pisaŭ.
Praściej ad usio vydać ułasnyja dumki za dumki apanenta i spračacca ź imi. Ale heta – manipulacyja hramadzkaj dumkaj.
Ksiondz Uładysłaŭ Zavalniuk, teolah Piotra Rudkoŭski i nieŭcarkoŭleny (pavodle słovaŭ uładyki Fiłareta) pravasłaŭny Alaksandar Fiaduta nie sprabujuć, stasoŭna pytańniaŭ viery, manipulavać hramadzkaj dumkaj. Jany adstojvajuć svajo prava vykazacca.
Ajciec Uładysłaŭ Zavalniuk – abviaściŭšy haładoŭku.
Teolah Piotra Rudkoŭski – zaklikaŭšy viernikaŭ bajkatavać prahlady filmu «Kod da Vinčy».
Žurnalist Alaksandar Fiaduta – abhruntoŭvajučy škodnaść palityčnych pravakacyjaŭ, źviazanych z pytańniami viery.
Žurnalist Vital Taras pracuje ŭ inšym žanry. Jon pravakuje ataku na tych, z kim niazhodny. Stasoŭna mianie jon robić heta nie ŭpieršyniu, pryčym štorazu śviadoma prypisvajučy mnie toje, čaho ja nie kazaŭ, nie pisaŭ, i navat nia mieŭ naŭviecie. Dla daviedki prašu redakcyju «NN» raźmiaścić u hazecie adras publikacyi, na hety raz taksama vielikadušna pracytavanaj sp.Tarasam:
Alaksandar Fiaduta
