U subotu 22 vieraśnia stała viadoma pra śmierć staršyni praŭleńnia BATE Anatola Kapskaha. Mieniedžaru było 52 hady. Jaho ŭkład u raźvićcio biełaruskaha futboła nieacenny, a bijahrafija — nastolki nasyčanaja, što nie kožny źbiare takuju i da svajho stahodździa, piša by.tribuna.com.
1. Adrazu paśla naradžeńnia zachvareŭ na zapaleńnie lohkich. Chłopčyk moh pamierci, tamu mietryku aformili z čatyrochdzionnym spaźnieńniem.
2. Vyras u vioscy. Baćka Anatol Ničyparavič, u honar jakoha i nazvali syna, byŭ ahranomam, a maci Sofja Zacharaŭna — cialatnica.
3. Jaho svajaki paciarpieli ŭ časy Ajčynnaj vajny. Fašysty rasstralali siaścior i dziaciej dzieda Kapskaha.
4. Praktyčna dva hady Kapski, va ŭzroście ź piaci da siami hadoŭ, pralažaŭ u špitali na vyciažcy. Była razdroblenaja tazaściehnavaja kostka. Paśla adna naha stała na niekalki santymietraŭ karaciejšaj. Usio praz toje, što chłopčyk niaŭdała zvaliŭsia z pryčepa i paškodziŭ tazabiedrany sustaŭ. Było nieviadoma, ci zmoža Kapski paŭnavartasna chadzić.
5. Chadziŭ u škołu za niekalki kiłamietraŭ ad doma. Paśla chvaroby nie moh samastojna viartacca dadomu, jaho davodziłasia zabirać mamie.
6. U dziacinstvie maryŭ stać doktaram.
7. Lubiŭ biełaruskuju movu. U školnyja hady sačynieńnie Kapskaha na temu «Kab sonca nad našaj radzimaju źziała, I klikaŭ nas Kołas, i klikaŭ Kupała» było siarod pryzioraŭ abłasnoha konkursu.
8. Skončyŭ Biełaruski dziaržaŭny instytut narodnaj haspadarki (ciapier BDEU) pa śpiecyjalnaści «ekanamist» (1987) i Akademiju kiravańnia (2007 h.).
9. Moh być vyklučany z BDEU praz kanflikt z supracoŭnikami dobraachvotnaj družyny, ale za jaho zastupiŭsia dekan.
10. U časy vučoby ŭ jakaści člena budatrada jeździŭ pracavać zvarščykam u Sibir.
11. Paśla zakančeńnia BDEU viarnuŭsia ŭ Barysaŭ — na 140-y ramontny zavod, dzie pracavaŭ ekanamistam.
12. Z 1990 pa 1995 hod byŭ finansavym dyrektaram pradpryjemstva «Połymia», jakoje zajmałasia aŭtabiźniesam. U aktyvach kampanii byli maršrutnaje taksi, STO i aŭtastajanka.
13. U 20-hadovym uzroście ŭ Kapskaha vyjavili rak. Pieršy kurs chimijaterapii prajšoŭ u 1987 hodzie. U 1999 hodzie zdaryŭsia recydyŭ chvaroby. Kapski tady prajšoŭ vosiem kursaŭ chimijaterapii za miažoj.
14. Kapski vieryŭ u Boha, naviedvaŭ carkvu. Atrymaŭ carkoŭny orden «Śviatoha dabraviernaha kniazia maskoŭskaha Daniiła» ad imia patryjarcha Aleksija II za dapamohu ŭ budaŭnictvie carkvy Rastva Chrystova ŭ Barysavie.
15. U siaredzinie 1995 hodzie Kapski ŭznačaliŭ kampaniju «Stałkier», praź jakuju pradavaŭ kamplektujučyja na BATE. Paźniej «Stałkier» staŭ adnym z dyleraŭ pradukcyi zavoda. U lepšyja miesiacy pradpryjemstva pradavała da 450 aŭtamabilaŭ: MAZy, KamAZy, HAZy, UAZy i inšuju techniku.
16. U 1996-m było vyrašana adnaŭlać zavadskuju kamandu BATE. Kiraŭnikom kłuba staŭ Anatol Kapski, a hałoŭnym sponsaram — jaho pradpryjemstva «Stałkier».
17. U tym ža hodzie partniory Kapskaha pa «Stałkiery» vykazali niezadavolenaść tym, što pradpryjemstva tracić na futboł bolš za pałovu dachodaŭ. Kapskamu pryjšłosia ŭleźci ŭ daŭhi, kab vykupić častku akcyj pradpryjemstva ŭ hetych kampańjonaŭ.
18. Na pieršym časie ŭ BATE Juryj Puntus i Juryj Pudyšaŭ nazyvali Kapskaha Talusikam.
19. U maładości lubiŭ mianiać halštuki. U kalekcyi Kapskaha ich było bolš za 40 štuk.
20. Na pačatku pradprymalnickaj karjery traplaŭ u składanyja situacyi. U 90-ch z dvuma hranatami RHD-5 u mašynie pajechaŭ u Baškiryju, kab viarnuć častku tavaru pradpryjemstva «Stałkier». Na błokpaście aŭtamabil pačali praviarać, ale ničoha nie znajšli.
21. Baćka Anatola Kapskaha byŭ zaŭziataram zbornaj Brazilii. Pamior u noč paśla finału čempijanatu śvietu 1998 hoda, u jakim brazilcy sastupili francuzam.
22. U 1999 hodzie Kapski pierajechaŭ žyć u Minsk. Paźniej pabudavaŭ dom u pryharadzie stalicy.
23. Kinuŭ palić ŭ 2004 hodzie.
24. Z 2004 hoda pierastaŭ być akcyjanieram futbolnaha kłuba BATE. Z tych časoŭ vykonvaŭ abaviazki staršyni praŭleńnia kłuba.
25. Zavod BATE ŭ 1990-ch staŭ akcyjaniernym tavarystvam z dolaj dziaržakcyj 2,7%. U 2001 hodzie hiendyrektara Busieła vymusili napisać zajavu pa ŭłasnym žadańni, a ŭ BATE ŭpieršyniu ŭ historyi Biełarusi byŭ aprabavany miechanizm «załatoj akcyi». Dziaržava atrymała mahčymaść nakładać vieta na rašeńni schodaŭ akcyjanieraŭ. Kapski staŭ hienieralnym dyrektaram BATE, čatyry hady da hetaha prapracavaŭšy namieśnikam.
26. U pieršy hod pracy Kapskaha ŭ jakaści hiendyrektara zavoda BATE pradpryjemstva atrymała nieraźmierkavany prybytak u pamiery 2,5 miljona dalaraŭ. U 2013-m čysty prybytak (źmianiłasia mietadałohija padlikaŭ Ministerstva finansaŭ) nie daciahnuŭ da 200 tysiač dołaraŭ.
27. Dobraachvotna syšoŭ z vykankamu ABFF. Paśla šmat krytykavaŭ rabotu hałoŭnaha orhana fiederacyi, nazyvajučy jaho členaŭ biezdarami i idyjotami.
28. Pieryjadyčna kanfliktavaŭ sa ŚMI. U roznyja časy ŭ BATE abvastralisia adnosiny z telekanałam STV, internet-prajektam Goals.by/Tribuna.com, hazietaj «Priessboł». Čas ad času Kapski zakryvaŭsia ad znosin ź miedyja. Niaredka telefanavaŭ žurnalistam, kab vykazać svaju pazicyju nakont publikacyi.
29. U futbolnym kłubie pracavali jaho svajaki. Plamieńnik Kirył Alšeŭski byŭ namieśnikam hienieralnaha dyrektara pa spartyŭnych pytańniach. Dačka Alesia Kapskaja da sychodu ŭ dekretny adpačynak była namieśnikam načalnika departamienta raźvićcia. Plamieńnik Viktar Chadasievič pracavaŭ śpiecyjalistam pa suviaziach z hramadskaściu.
30. Ličyŭ siabie ranimym čałaviekam. «Praściej ža ŭsiaho abražać kahości, kali viedaješ, što zastaniešsia biespakaranym. Heta ja pra niekatorych nasielnikaŭ internetu. Naohuł, ja vielmi ranimy čałaviek. I ŭsie blizkija viedajuć, što mianie lohka začapić», — pryznavaŭsia Kapski.
31. Uchvalaŭ u BATE pierajemnaść pakaleńniaŭ. Za čas pracy Kapskaha ŭ kłubie było tolki šeść hałoŭnych trenieraŭ, i tolki adzin pryjšoŭ z boku. Mnohija eks-hulcy BATE ciapier zajmajuć u struktury kłuba roznyja pasady.
32. Zaŭsiody abaraniaŭ rabotnikaŭ kłuba, pryčym vielmi impulsiŭna. Paśla matču BATE — «Šachcior» u 2004 hodzie ŭ padtrybunnym pamiaškańni ledź nie pabiŭsia ź Juryjem Viarhiejčykam.
33. Rekanstrujavaŭ stadyjon «Haradski» ŭ Barysavie. Taksama BATE prymaŭ udzieł u budaŭnictvie «Barysaŭ-Areny», jaki byŭ dabudavany ŭ 2014 hodzie. Košt stadyjona aceńvajecca prykładna ŭ 58 miljonaŭ dalaraŭ — praŭda, finansavy ŭkład kłuba nie vielmi vialiki.
34. Dva hady nie vitaŭsia z Kryvušenkam paśla sychodžańnia treniera z BATE.
35. Lubimymi kamientatarami nazyvaŭ Juryja Rozanava i Vasila Utkina, niahledziačy na vypady apošniaha ŭ adras kłuba.
36. Na vybarach prezidenta ŭ 2010 hodzie byŭ davieranaj asobaj Alaksandra Łukašenki. U hetym statusie pravioŭ šmat sustreč z vybarščykami. Ličyŭ, što dziejučy prezident źjaŭlajecca harantam sacyjalna-ekanamičnaha raźvićcia.
37. U 2011 hodzie Łukašenka padpisaŭ ukaz ab stvareńni vakoł zavoda BATE chołdynhu «Aŭtakampanienty». Pad kiraŭnictvam Anatola Kapskaha abjadnalisia 12 pradpryjemstvaŭ, jakija zajmajucca vytvorčaściu zapčastak.
38. Zhodna z Ukazam prezidenta №388 ad 30.08.2011, za dobruju pracu chołdynhu «Aŭtakampanienty» pa vynikach hoda Kapski moh atrymać ŭznaharodžańnie nie bolš za dźvie tysiačy dołaraŭ.
39. U studzieni 2013-ha ŭ Vilni pieranios najskładaniejšuju apieracyju na sercy, paśla jakoj znachodziŭsia ŭ trochdzionnaj komie.
40. Vielmi lubiŭ jahady: durnicy, maliny, sunicy. Kali Kapski adnaŭlaŭsia paśla apieracyi na sercy, siabry i svajaki prynosili ich u balnicu ŭ vielizarnaj kolkaści.
41. U 2013 hodzie źbiraŭsia pakinuć pasadu staršyni praŭleńnia BATE. Paśla pieramohi BATE nad «Debrecenam» zajaviŭ, što stamiŭsia ad pastajannaj krytyki ŭ adras kłuba. Pierajemnikam nazyvaŭ svajho namieśnika Alaksandra Zacharčanku. U kancy siezonu Kapski spasłaŭsia na zaniataść Zacharčanki na zavodzie MAZ i praciahnuŭ kiravać BATE.
42. Addavaŭ pieravahu žorstkamu stylu kiravańnia, byŭ prychilnikam žorstkaj ruki va ŭładzie. Ličyŭ, što palityka Pucina lepšaja za palityku Harbačova abo Jelcyna. Lubimyja palityčnyja dziejačy — Marharet Tetčer, Ruźvielt, Mašeraŭ, Hramyka. Prymakoŭ.
43. Kapski atrymlivaŭ prapanovy pradać BATE. Cikaŭnaść da kłuba prajaŭlali nie tolki rasijskija kampanii, ale kampramis nie byŭ znojdzieny. Adnoj z abaviazkovych umoŭ staršyni praŭleńnia było toje, što jon zastajecca kiraŭnikom kłuba.
44. U šlubie z Ałaj Kapskaj vyhadavaŭ dvaich dziaciej — dačku Alesiu i syna Andreja, jaki pracavaŭ u struktury zavoda BATE. Akramia hetaha, u Kapskaha jašče dva syny.
45. Kapski pravaročvaŭ samyja bujnyja ździełki na tranśfiernym rynku Biełarusi. Za pierachod Vitala Kutuzava ŭ «Miłan» BATE atrymaŭ 3,5 miljona jeŭra. Za kuplu sierba Mirki Ivaniča «žoŭta-sinija» zapłacili miljon jeŭra.
46. Lubiŭ tvorčaść irłandskaha muzyki Hery Mura. Chadziŭ na minski kancert «Scorpions».
47. U 2014 hodzie pa viersii «Ježiednievnika» staŭ samym paśpiachovym biznesmienam Minskaj vobłaści.
48. Nie bačyŭ siabie ŭ kreśle čynoŭnika, choć atrymlivaŭ prapanovy ŭznačalić ABFF. U časy pracy ŭ fiederacyi Hienadzia Niavyhłasa člen kamiteta UEFA pa statusie i pierachodach futbalistaŭ Siarhiej Iljič prapanoŭvaŭ napisać Kapskamu pieradvybarčuju prahramu na pasadu kiraŭnika fiederacyi. Kiraŭnik BATE admoviŭsia.
