Hienieralny sakratar AAN Antoniu Huteryš zapatrabavaŭ raskryć praŭdu pra los saudaŭskaha apazicyjnaha žurnalista Džamala Chašahi, jaki prapaŭ paśla vizitu ŭ konsulstva Saudaŭskaj Aravii ŭ Stambule, piša bbc.com.
«Takich incydentaŭ robicca ŭsio bolš, tamu mižnarodnaja supolnaść pavinna jasna zajavić pra toje, što heta nieprymalna», - skazaŭ hienieralny sakratar AAN.
Napiaredadni źjaviłasia infarmacyja, što ŭłady Turcyi majuć aŭdyja- i videazapisy, jakija dakazvajuć, što žurnalist byŭ zabity ŭ budynku konsulstva. U ŚMI taksama źjavilisia padrabiaznaści zabojstva.
Ułady Saudaŭskaj Aravii nazvali śćviardžeńni iłžyvymi.
Džamal Chašahi, viadomy krytyk kirujučaj dynastyi ŭ Er-Ryjadzie, zajšoŭ u konsulstva Saudaŭskaj Aravii ŭ Stambule dniom 2 kastryčnika. Z taho času jaho nichto nie bačyŭ.
Chašahi źbiraŭsia zaviaršyć praceduru razvodu, što dało b jamu mahčymaść ažanicca sa svajoj tureckaj niaviestaj.
Jak paviedamlali ŚMI, pierad tym, jak uvajści ŭ budynak, žurnalist paprasiŭ naračonuju padniać tryvohu, kali jon nie vyjdzie praz čatyry hadziny. Jana pračakała Chašahi la ŭvachodu 11 hadzin.
U piatnicu blizkaja da specsłužbaŭ Turcyi krynica Bi-bi-si paviedamiła, što ŭ tureckich uładaŭ jość videa- i aŭdyjazapisy, jakija dakazvajuć, što žurnalist byŭ zabity ŭ konsulstvie.
Hazieta Washington Post, spasyłajučysia na nienazvanych tureckich čynoŭnikaŭ, napisała pra dokazy zabojstva Chašahi, jakija jość u rasparadžeńni ŭładaŭ Turcyi.
«Tam čutny jaho hołas i hałasy mužčyn, jakija havorać pa-arabsku, — raspaviała krynica haziety pra źmiest zapisaŭ. - -Čutno, jak jaho dapytvajuć, katujuć, a zatym i zabivajuć».
Pavodle krynic vydańnia, u budynku konsulstva žurnalista zabili, a jaho cieła rasčlanili.
Jak paviedamili krynicy haziety Guardian, pareštki nibyta vyvieźli z terytoryi ŭ mašynach z dypłamatyčnymi numarami i zakapali kala rezydencyi konsuła, raźmieščanaj niepadalok.
Jak paviedamiła tureckaja hazieta Sabah sa spasyłkaj na krynicy ŭ pravaachoŭnych orhanach, momant zabojstva i dopyt žurnalista zapisalisia na jaho smart-hadzińnik Apple Watch.
Pierad uvachodam u konsulstva Chašahi pakinuŭ niavieście ajfon (jaho nielha pranosić usiaredzinu), a hadzińnik pieravioŭ u režym zapisu. U vyniku aŭdyjazapis byŭ pieradadzieny na smartfon, ź jakim sinchranizavany hadzińnik, a zatym aŭtamatyčna zahružany ŭ vobłačnaje schovišča iCloud.
Praź dziesiać dzion u Er-Ryjadzie pavinien startavać bujny inviestycyjny forum Future Investment Initiative (FII), adnak z-za źniknieńnia žurnalista šerah upłyvovych kampanij i ŚMI ŭžo admovilisia ad udziełu ŭ mierapryjemstvie.
Prezident ZŠA Donald Tramp zajaviŭ, što pakul nie havaryŭ z karalom Saudaŭskaj Aravii Sałmanam ab źniknieńni žurnalista, ale nieŭzabavie jamu patelefanuje.
«Heta vielmi surjoznaja reč, i my vielmi surjozna joj zojmiemsia», — cytuje Trampa Rejter.
Prezident Turcyi Redžep Taip Erdahan raniej skazaŭ, što Saudaŭskaja Aravija pavinna dakazać svaju niedatyčnaść da źniknieńnia žurnalista.
U toj ža čas kiraŭniki MZS Bachrejna i AAE padtrymali Saudaŭskuju Araviju. Pa ich viersii, meta skandału — naškodzić Saudaŭskaj Aravii, a nie žadańnie raskryć praŭdu.
Kamientary